Dekabrın 22-də Sumqayıt şəhər inteqrasiya təlimli internat tipli gimnaziyada "Fövqəladə hallar uşaqların gözü ilə” VII Ümumrespublika uşaq yaradıcılıq müsabiqəsi qaliblərinin mükafatlandırılması mərasimi olub.
Tədbirdə Fövqəladə Hallar Nazirliyi Sumqayıt Regional Mərkəzinin əməkdaşları, gimnaziyanın müəllim və şagirdləri iştirak ediblər.
Əvvəlcə, gimnaziyada təhsil alan uşaqların əl işləri nümayiş olunub.
Tədbirdə bildirilib ki, Sentyabr-dekabr ayları ərzində keçirilmiş müsabiqənin məqsədi uşaqlara təhlükəsiz həyat fəaliyyətinin əsaslarının öyrədilməsi və mədəniyyətinin formalaşdırılması, istedadlı uşaqların üzə çıxarılması və onlara dəstək verilməsi, yetişməkdə olan gənc nəslin vətənpərvərlik ruhunda tərbiyəsi, fövqəladə hal probleminə ictimaiyyətin diqqətinin yönəldilməsi olub.
Ölkənin bütün şəhər və rayonlarının ümumtəhsil məktəblərinin iştirak etdiyi respublika uşaq yaradıcılıq müsabiqəsi rəsm, plakat, əl işi, yanğın və qəza-xilasetmə texnikasının modeli, yumşaq oyuncaq nominasiyalarında məktəb, rayon və ümumrespublika birinciliyi mərhələləri üzrə keçirilib.
Sonra respublika uşaq yaradıcılıq müsabiqəsində yer tutmuş uşaqlara fəxri fərmanlar və qiymətli hədiyyələr təqdim olunub.
Tədbir bədii hissə ilə davam edib.
Xəbərdən istifadə edərkən istinad etmək vacibdir.
