Ölkənin əsas sənaye şəhərlərindən biri olan Sumqayıt bu yaxınlarda şəhər statusu almasının 70 illik yubileyini qeyd etdi. Şəhər günü münasibətilə Sumqayıta səfər edən ölkə başçısı İlham Əliyev şəhərdə aparılan işlərlə tanış olub və bir neçə sosial obyektlərin açılışında iştirak edib.
Elə həmin gün Sumqayıtda çoxmənzilli binaların dam örtüklərinin dəyişdirilməsi işlərinin davam etdirilməsi ilə bağlı əlavə tədbirlər haqqında Azərbaycan Respublikası Prezidentinin Sərəncamı ilə 100 binanın damının yenilənməsi üçün Prezidentinin ehtiyat fondundan 6 milyon manat vəsait ayırılıb.
Nəzərdə tutulan işlər barədə Xeberle.com-a məlumat verən Sumqayıt şəhər Mənzil Kommunal Təsərrüfatı İstehsalat Birliyinin sözçüsü Xəqani Həşimov 6 milyon manatın taleyinə aydınlıq gətirib: "İndiyə qədər 950-yə yaxın binanın dam örtüyü artıq dəyişdirilib. Son ayrılan vəsaitlə təmir olunacaq növbəti 100 bina isə 1, 2, 3, 4, 5, 7, 8, 12, 14, 16, 29, 30, 34-cü məhəllələr və 1-ci mikrorayonun ərazilərində nəzərdə tutulub.”
Qeyd edək ki, son 10 il ərzində Sumqayıta 107.7 milyon manat pul ayrılıb. Ümumi məbləğin 68.7 milyon manatı hazırki icra başçısı Zakir Fərəcovun şəhərə rəhbərlik etdiyi dövrə təsadüf edir.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
