Bu gündən - 17 yanvar tarixindən etibarən Azərbaycanda cari ilin fevralın 9-na təyin olunan Milli Məclisə növbədənkənar seçkilər çərçivəsində təbliğat-təşviqat kampaniyasına start verilib. Seçkilərə maraq əvvəlki illərdən daha artıqdır. Bu da özünü ilk növbədə qeydiyyatdan keçmiş namizədlərin sayında göstərir. Belə ki, 125 dairə üzrə 1500-dən artıq namizəd qeydiyyatdan keçib ki, bu da rekord göstərici sayılır. Sumqayıtda da seçkilərə maraq həddən artıq böyükdür, xüsusən 44 saylı Sumqayıt - Xızı seçki dairəsi üzrə. Belə ki, buradan ilkin mərhələdə 36 nəfər namizədiyini versə də, sonradan 9 nəfəri şəxsən namizədliyindən imtina etmişdir. Budəfəki namizədlər sırasında gənclər üstünlük təşkil edir. Belə gənclərdən biri də Toğrul Əlixanovdur. 44 saylı Sumqayıt - Xızı seçki dairəsindən Milli Məclisdə mandat adı uğrunda yarışan 29 yaşlı gənclə görüşərək söhbətləşdik, fikirləri, hədəfləri, platforması barədə məlumat aldıq. Müsahibəni olduğu kimi təqdim edirik.

HAŞİYƏ:Toğrul Əlixanov 1990-cı ildə Sumqayıt şəhərində doğulmuş və hazırda bu şəhərdə yaşayır. 2007-ci ildə 11 saylı tam orta məktəbi bitirmiş, 1 il sonra ADMİU-nun "Beynəlxalq münasibətlər, Beynəlxalq mədəni əlaqələr” ixtisasına qəbul olunmuş və 2012-ci ildə ali məktəbi fərqlənmə diplomu ilə bitirmişdir. 2009-cu ildə ABŞ-ın Vaşinqton şəhərində təcrübə proqramı keçmiş, 2012-ci ildə Türkiyənin İzmir şəhərində yerləşən Yaşar Universitetinə "Biznesin idarə edilməsi” ixtisasına daxil olmuş, 2 il sonra isə fərqlənmə diplomu ilə magistr dərəcəsinə yiyələnmişdir. 2014-cü ildə ikinci dəfə magistr dərəcəsi almaq üçün (qiyabi) Moskva Texniki İnstitutunun "Maliyə işi” ixitisasına qəbul olunmuşdur. Müxtəlif layihələrdə iştirak etmiş, bir sıra sertifik, diplom və fəxri fərmanla təltif olunmuşdur. ADMİU Tələbə Gənclər Təşkilatının sədr müavini, fakültə Həmkarlar İttifaqının sədri, Yaşar Universitetində Turizm Klubunun prezidenti vəzifələrində çalışmışdır. 2014-2015-ci illərdə "Olefin” Elmi Tətqiqat İnstitutunda Beynəlxalq şöbənin rəhbəri vəzifəsində işləmiş, 2015-ci ildən etibarən isə dünyanın ən böyük kimya şirkəti olan BASF-da layihələr üzrə satış mütəxəssisi kimi fəaliyyət göstərir. Ailəlidir.

 

-Toğrul müəllim, sizi cari ildə Milli Məclisə keçiriləcək növbədənkənar parlament seçkilərində iştirak etməyə nə, daha doğrusu, hansı şərtlər sövq etdi?

-Bilirsiniz, valideynlərim bizi hər zaman vətənpərvər ruhda böyüdüblər. Biz daim Vətənə, millətə, dövlətə xeyirli övlad olmaq uğrunda çalışmışıq. Ölkə başçımız parlamentin buraxılması haqqında sərəncamı imzaladıqdan sonra vətəndaşlara müraciətində, gənclərə inandığını və yeni çağırış parlamentin üzvlərinin gənclərdən ibarət olmasını istədiyini bildirdi. Cənab Prezidentin bu fikrini bir çağırış kimi dəyərləndirdim. Düşündüm ki, ölkə başçısı bu çağırışı edirsə, bir ziyalı gənc kimi seçki marafonunda iştirak etməliyəm. Öz fikirlərimi geniş kütləyə çatdırmalıyam, seçicilərin etimadını qazanacağım təqdirdə, millət üçün daha böyük əzm və iradə ilə çalışmalıyam.

 

-Şəhər üzrə ən çox namizədin iştirak edəcəyi 44 saylı Sumqayıt-Xızı seçki dairəsi üzrə mübarizəyə başlayırsınız. Niyə məhz bu dairəni seçdiniz?

-Mən Sumqayıtda məhz bu dairənin ərazisində dünyaya gəlmişəm. Bu dairənin ərazisində təhsil almışam, məni burda tanıyanlar, bilənlər çoxdur. Mən də öz növbəmdə 44 saylı Sumqayıt-Xızı dairəsinin Sumqayıtda yerləşən ərazisini yaxşı tanıyıram, burda böyümüşəm. Hər küçəsini, hər dalanını bilirəm. İnsanlarını yaxşı tanıyır, onların problemlərini bilirəm. Xızıya gəldikdə isə açığı deyim ki, namizədliyimi irəli sürənə qədər Xızı şəhəri və ətraf kəndləri haqqında ciddi biliklərim yox idi. Lakin bu dairədən namizədliyimi irəli sürəcəyimi özlüyümdə qətiləşdirdiyim zaman bölgəyə səfər etdim. Demək olar ki, bütün kəndləri gəzdim, insanlarla söhbət etdim. Bölgənin potensialı haqqında məlumat topladım. Bu bölgəni daha da inkişaf etdirmək, insanların rifahını daha da yaxşılaşdırmaq üçün nələr edə bilərik - bu barədə analiz elədim. İnsanlarla söhbət zamanı onu anladım ki, bizim kimi gənc, Xızı camaatı ilə yaxşı işlər görə bilər. Çox mehriban, qonaqpərvər və səmimi insanlardır.

 

-Seçkilərə qədər rəqiblərinizdən hansını tanıyırdınız və necə düşünürsünüz, hansı rəqiblər arasında daha gərgin mübarizə olacaq?

-Açığını desəm, seçkilərə qədər heç bir namizədi tanımırdım. Lakin rəqiblərimi araşdırmağa başladıqca ayrı-ayrı sahələrdə hər birinin üstün cəhətlərinin olduğunu anladım. Hər birinə seçki marafonunda uğurlar arzulayıram.

 

-Sizi rəqiblərinizdən fərqləndirən əsas xüsusiyyətlər hansıdır?

-Mən düşünmürəm ki, bu suala kimsə tam dolğun cavab verə bilsin. Çünki hələlik heç kim seçki platformasını ictimaiyyətə açıqlamayıb. Lakin onu qeyd edə bilərəm ki, mən müxtəlif ölkələrdə yüksək keyfiyyətli təhsil almışam. Qlobal bir şirkətdə 5 illik təcrübəm var və düşünürəm ki, bu çox önəmlidir. Çünki dünya ölkələrinin praktikalarını görə bilmişəm. Onların müsbət və mənfi yönlərini araşdırmaq üçün kifayət qədər zamanım və təcrübəm olub. Ən əsas məqamlardan biri isə odur ki, artıq qeyd etdiyim kimi, cənab Prezident qarşıdan gələn parlament seçkilərində gənclərə çağırış etdi və bildirmək istəyirəm ki, 44 saylı Sumqayıt-Xızı seçki dairəsindən qeydə alınmış namizədlərin siyahısına baxsanız, görərsiniz ki, Azərbaycan Respublikasının qanunvericiliyinə əsasən yeganə gənc namizəd məhz mənəm. Çünki müvafiq qanunda qeyd olunur ki, Azərbaycan Respublikasında gənc yaşı 14-29 yaş arası olan şəxslərdir.

 

-Etiraf edək ki, əvvəlki dövrlərdə parlament seçkiləri öncəsi deputatlığa namizədlərin çoxu seçicilər qarşısında vədlər verirdi. "Əgər məni deputat seçsəniz, yeni yollar çəkəcəm”, "körpülər tikəcəm” və sair. Halbuki, bu gün deputatlarımızın çoxu seçici qarşısında hər hansı vədin verilməsini qəbul etmir. Bununla bağlı nə deyə bilərsiniz?

-Bu kimi vədlər absurddur. Çünki Azərbaycan Respublikasının Konstitusiyasında deputatın hüquqları, vəzifələri və səlahiyyətləri aydın şəkildə göstərilib. Ümumiyyətlə deputatlığa namizəd hər hansı bir məsələnin həlli üçün səy göstərəciyi, bu problem barəsində məsələ qaldıracağı vədi verə bilər. Çünki Milli Məclisdə müzarikə olunan qanunlar səs çoxluğu hesabı ilə qəbul olunur. Yəni anlayacağınız, bu tək adamın görə biləcəyi iş deyil.

 

-Sizin platformanız nədən ibarətdir?

-Sumqayıtın inkişafı, sakinlərin sosial rifahının artırılması üçün hansı töhfələri verə biləcəyinizi düşünürsünüz?

-İlk olaraq, yuxarıda da qeyd etdiyim kimi, burda kiçik və orta sahibkarlığı daha da inkişaf etdirmək lazımdır. Bunu bacara bilsək, regionda yaşayan bütün yaş qruplarından olan əhali üçün yeni imkanlar yaratmış olacağıq. Bunun üçün Mərkəzi Bank qarşısında regiona yönəlmiş kredit xəttinin artırılması və faiz dərəcəsinin aşağı salınması üçün məsələ qaldıracağıq. Sumqayıt həm də kimya şəhəridir. Bilirsiniz ki, möhtərəm prezidentimiz, cənab İlham Əliyev Sumqayıt Texnologiyalar Parkında yeni istehsalat sahələrinin yaradılması ilə əlaqədər böyük işlər görülməsi üçün çox sayda sərəncamlar imzalayıb. Bundan sonra da dövlət büdcəsindən bura vəsaitin artırılması və xarici investisiya cəlb edilməsi üçün müvafiq dövlət orqanları ilə birgə sıx əməkdaşlıq içində olacağıq. Bu həm də bizim istehsal gücümüzün artması, ölkəyə valyuta axını, idxal-ixrac balansı arasındakı fərqi azaltmağa yönəlmiş addım olacaq. Yeni iş yerləri, yeni imkanlar, yeni töhfələr bu işlər sayəsində olacağına inanıram.

-Sizcə, işsizlikdən başqa Sumqayıtın əsas problemləri hansılardır?

-Sumqayıt gənclər şəhəridir. Lakin, günümüzdə diqqət etsəniz, görərsiniz ki, Sumqayıtda gənclərin vaxt keçirə biləcəyi məkanlar kifayət qədər azdır. Gənclik enerjidir, biliyə və təcrübəyə can atan təbəqədir, gənclik həm də əyləncədir. Bunların hamısını əslində birləşdirə bilsək, inanın ki, Sumqayıtda problem qalmaz. Təklif edərdim ki, Sumqayıt şəhərində yeni, ən müasir texnologiyalarla təchiz olunmuş laboratoriyaları olan, müasir dünyanın tələblərinə uyğun müxtəlif ixtisasların tədris ediləcəyi universitet kampusu, tələbə yataqxanaları tikilsin. Dünyanın hər nöqtəsindən gənclər bu təhsil ocağına toplansın. Yeni kəşflər - yeni imkanlar deməkdir. Bu həm də böyük biznes sahələrinə töhfədir. Belə ki, müxtəlif ölkələrin gəncləri bir şəhərdə toplanarsa, kiçik və orta sahibkarlıq öz-özlüyündə inkişaf edəcək. Yeni bazar formlaşacaq. Təsəvvür edin ki, bu gənclər yeni texnologiyalardan istifadə edərək bazara yeni məhsullar çıxarda bilər. "Start up” layihələri bu gün Qərb ölkələrində gənclərə milyonlar qazandıra bilir. Bu ideyanı həyata keçirmək üçün isə Allaha şükür olsun ki, güclü dövlətimiz və daim gənclərə dayaq olan ölkə başçımız var.

-İndiyədək ictimaiyyətə şəhərin hansı problemlərini araşdıraraq çıxış yollarını bildirmisiniz və bu barədə hansı orqanlara məlumat vermisiniz?

-Açığı, indiyə qədər yalnız işlədiyim sahədə - yəni tikinti kimyəviləri sahəsində cəmiyyətə töhfə verməyə çalışmışam. Bilirsiniz ki, ölkəmizin hər tərəfində maraqlı memarlıq nümunələri, fabriklər, zavodlar, fermalar tikilir. Tikintilər müasirləşdikcə orda istifadə olunan sistemlər də mürəkkəbləşir. Bu, həmçinin, ekoloji problemlərə yol aça bilir ki, biz də onun qarşısını almağa çalışırıq. Bunun üçün tikinti layihələrinə yeni şərtnamələr yazmaqla, ekoloji təmiz məhsullar istifadə etməklə, yeni sistemlər təqdim etməklə işin daha tez və daha az sərmayə yatırımı ilə bitməsi üçün çalışırıq.

 

-Seçicilərə istək və arzularınız nədir?

-Seçicilərdən ən böyük istəyim budur ki, fəal olaraq seçkilərdə iştirak etsinlər, arzum budur ki, seçkilərdə məni, Sumqayıtın gənc namizədini dəstəkləsinlər və əsla bir şeyi unutmasınlar: "BİZ BİRLİKDƏ BACARACAĞIQ!”

Hazırladı: Xeberle.com-un siyasət şöbəsi

Xəbərdən istifadə edərkən istinad etmək vacibdir.