Xeberle.com xəbər verir ki, deputatlığa namizəd seçicilərlə bu dəfəki görüşünü Sumqayıt Olimpiya Kompleksində 17-ci mikrorayon seçiciləri ilə keçirib.

E. Cəfərov seçicilər qarşısında çıxış edərək seçki platforması haqqında geniş məlumat verib və gələcəkdə həyata keçirəcəyi işlərdən danışıb.

Diskusiya şəraitində keçən görüşdə deputatlığa namizəd seçicilərin suallarını cavablandırıb.

O, etimad göstəriləcəyi təqdirdə qaldırılan hər bir məsələnin həllinə böyük səylə çalışacağını seçicilərin diqqətinə çatdırıb: "İstəyən hər kəsə öz adımdan notarial qaydada təsdiqlənmiş sənəd təqdim edəcəyəm ki, millət vəkili seçildikdən sonrakı 5 il müddətində hazırda yaşadığım ünvandan, yəni 17-ci mikrorayon ərazisindən köçməyəcəyəm. Qərargahım və şəxsim hər zaman seçicilərimə əlçatan olacaq. Və həmçinin bu 5 illik fəaliyyətim sona çatdıqdan sonra daha gənc və müasir gənclərin parlamentdə öz xalqını təmsil etməklərinə yardımçı olmaq məqsədi ilə yenidən namizədliyimi irəli sürməyəcəyəm. Mən xalqım qarşısında olan bu şərəfli işi tam məsuliyyəti ilə dərk edirəm!"

Görüşdə səhiyyədə, təhsildə, sosial sahədə, iş mühitində olan hazırkı problemlərə də toxunulub.

Sonda "Xalq öz müqəddəratını yalnız özü həll edə bilər!" söyləyən Elman Cəfərov bütün sumqayıtlıları seçkidə fəal iştirak etməyə çağırıb.