Bu yaxınlarda yazıçı-publisist, Prezident mükafatçısı Arif Ərşadın "Evimin dayağı” hekayəsini diqqətlə və maraqla oxudum. Hekayənin əsas mövzusu ailədir, ailədəki problemlərdir, ər ilə arvad arasındakı münaqişələrdir və bu münaqişələrin ən çox əziyyət çəkəni uşaqlardır. Arif Ərşad bu məsələyə ciddi, ürək ağrısı ilə yanaşaraq körpə uşaqların kövrək baxışlarını və düşüncələrini maraqlı şəkildə qələmə alıb. Onu da qeyd etmək istərdim ki, belə hadisələrə gündəlik həyatımızda tez-tez rast gəlirik.
Amma mənə elə gəlir ki, hekayənin ana xətti tamamilə başqa bir məsələdir: ailənin dağılması. Boşanma halları respublikada artmaqdadır. Çox təəssüflər olsun ki, Avropada nigahın pozulması üzrə üçüncü yerdəyik.
Mənə elə gəlir ki, yazıçını düşündürən də budur: kişinin evi, qadının ismətidir.
Boşanma hallarının respublikada artmasını mən Qərbdən bizə ötürülən bir təxribat hesab edirəm; bu, Azərbaycan xalqının ailə institutunu, onun sarsılmaz birliyini və sağlam nəsil yetişməsini zəiflətmək məqsədi daşıyır. Bu, həmçinin milli genetik fondumuza zərbədir. Təəssüflər olsun ki, buna nail olunmaqdadır.
Arifin bu hekayəsini gənclər tərəfindən oxunması vacibdir; onlar bu mövzu haqqında ciddi düşünməli və qurduqları ailənin, yazıçının qeyd etdiyi kimi, sarsılmaz dayağı olmasını təmin etməlidirlər.
Eyruz Məmmədov, Azərbaycanın əməkdar jurnalisti, yazıçı-publisist
Xəbərdən istifadə edərkən istinad etmək vacibdir.
