Şairin qələm dostlarının, yaxınlarının, ailə üzvlərinin iştirak etdiyi tədbirdə Azərbaycan Jurnalistlər Birliyi Sumqayıt şəhər təşkilatının sədri, respublikanın Əməkdar jurnalisti, şair-publisist Rafiq Oday şairin həyat və yaradıcılığı haqqında oxuculara geniş məlumat verib.

Kitaba həm redaktorluq edən, həm də "Ömrün qürub çağı” və ya "Müdrikliyin zirvəsindən boylanan illər" adlı ön söz yazan Rafiq Oday bildirib ki, Şərbətəli Mahmudov müəllim kimi müqəddəs bir adı fəxrlə daşıyır.

Tədbirdə Azərbaycan Yazıçılar Birliyi Sumqayıt bölməsinin sədri Gülnarə Cəmaləddin, AYB və AJB üzvləri Asif Asiman, "Manevr.az" saytının təsisçisi və baş redaktoru Namiq Dəlidağlı, Qubadlı rayon İcra Hakimiyyətinin mətbuat xidmətinin rəhbəri, "Sözün sehri" qəzetinin təsisçisi Qafqaz Əvəzoğlu, "Zaman və biz" qəzerinin təsisçisi və baş redaktoru Sübhan Arifoğlu, "Sumqayıt" jurnalının baş redaktoru Elcan Oruclu, Ələsgər Həsənli, Nizami Kolanlı, Teyyub Ağazadə, Qaratel Azəri, Lilpar Cəmişidqızı, "Sabaha inamla" qəzetinin təsisçisi və baş redaktoru Namiq Məmmədli, Nurəddin Cəfərov, Rəna Təbəssüm, kitabın korrektoru Mərcan Sabirqızı və başqaları çıxış edərək kitab haqqında öz fikirlərini bildiriblər və müəllifə yeni yaradıcılıq uğurları arzulayıblar. Həmçinin Şərbətəli Mahmudovun övladları çıxış edərək atalarına göstərilən diqqət və qayğıya görə tədbirin təşkilatçılarına - AJB Sumqayıt şəhər şöbəsinə və "Azəri" nəşriyyatının rəhbərliyinə minnətdarlıqlarını ifadə ediblər.

Şagirdlərin ifasında Şərbətəli Mahmudovun vətənbərvərlik ruhlu şeirləri səsləndirilib.

Sonda Şərbətəli Mahmudov tədbirdə iştirak edən qələm dostlarına təşəkkürünü bildirib və yeni şeirlərini oxuyub.

Qeyd edək ki, kitaba 9 fəsil altında müəllifin müxtəlif səpkili şeirləri daxil edilib.

Elnarə Salamova

Xeberle.com