Sumqayıt şəhər Səməd Vurğun adına Mərkəzi Kitabxanada Azərbaycan Jurnalistlər Birliyinin üzvü, "Həsən bəy Zərdabi”, ”Qızıl Qələm”, ”Araz” Ali-Bədii mükafatları laureatı, Respublikanın Əməkdar Jurnalisti, yazıçı-publisist Eyruz Məmmədovun "P.S.” romanının müzakirəsi keçirilib. Mərkəzi kitabxanadan Xeberle.com-a verilən məlumata görə, tədbiri kitabxananın abonement şöbəsinin müdiri Zemfira Mirzəyeva açaraq iştirakçıları salamlayıb. Tədbirin məramı haqda danışan, müzakirəsi keçirilən "P.S” kitabı ilə bağlı şəxsi mülahizələrini oxucularla bölüşən Z.Mirzəyeva sözü kitabın müəllifinə verib. Qələmi, imzası ilə oxuculara yaxşı tanış olan Eyruz Məmmədov iştirakçılara "P.S.” romanının yaranması haqqında qısa məlumat verib. Sonra romanın müzakirəsi aparılıb. Qeyd olunub ki, kitab məhəbbət mövzusunda yazılsa da, eyni zamanda narkomaniyanın insan sağlamlığına və şəxsiyyətinə vurduğu ziyanı, ailəni, övladı belə arxa plana salan pul hərisliyinin, dosta xəyanətin insanı necə çirkinləşdirdiyini açıb göstərir.

Müəllif iştirakçıları maraqlandıran sualları cavablandırıb.

Yazıçının qələm dostlarından Asif Asiman, Qüdrət Muğanlı və başqaları çıxış edərək kitab haqqında öz fikirlərini söyləməklə yanaşı, Eyruz Məmmədovun yaradıcılığından, şəxsiyyətindən, insani keyfiyyətlərindən də söz açıblar.

Sonda E.Məmmədov iştirakçılara imzalı "P.S.” kitabını hədiyyə edib.

Qeyd edək ki, Eyruz Məmmədov "Sumqayıtım mənim”, ”2-ci paralel”, ”28-dən 29-na keçən gecə”, ”Anata”, "Gecə...incə gecə” və digər kitabların müəllifi, həmçinin "Sumqayıtın əks-sədası”, ”Sumqayıt: Azadlığın əks-sədası”, ”Cəbhə bölgəsində”, ”Sumqayıt” və s. sənədli filmlərin ssenari müəllifidir. Yazıçının əsərləri rus, alman və ingilis dillərinə tərcümə edilib.

Xeberle.com