Oktyabrın 27-də Lənkəran rayon İcra Hakimiyyəti başçısı Taleh Qaraşov Mədəniyyət Mərkəzində toplantı keçirib. Adının açıqlanmasını istəməyən toplanı iştirakçılarından birinin Meydan TV-yə verdiyi məlumata görə, icra başçısı seçkilərdə "karusel əməliyyatı” keçirmək üçün tapşırıqlar verib.

Taleh Qaraşovun tapşırığına əsasən, 73 saylı Seçki Dairəsindən təkrar namizədliyi irəli sürülmüş hazırkı deputat Rüfət Quliyevin xeyrinə səs toplamaq üçün insanlar kütləvi şəkildə məntəqələrə aparılmalıdır. İclasda "seçici”lərin bir neçə məntəqədə səs verməsini təmin etmək üçün "onbaşılar”,” yüzbaşılar” və "minbaşılar” təyin edilib. Baş verənlərin videogörüntüsündən bəlli olur ki, 10 nəfərin seçki karuiselində iştirakını təmin etmək işi tapşırılan adamlar "onbaşı” adlanır və onların tabe olduğu "yüzbaşılar”ı tanıması mütləqdir. Bu qayda ilə onbaşılar yüzbaşılara, onlara isə öz növbəsində minbaşılara tabe edilib.

Mənbə deyib ki, seçkilərə total nəzarəti nəzərdə tutan icra başçısı hazırkı deputatın xeyrinə seçkiləri saxtalaşdırmaq üçün bu cür toplantıları davamlı olaraq keçirir və bunun üçün hazirkı deputatdan vəsait alır.

Azərbaycan Respublikası Cinayət Məcəlləsinin 308.1-ci maddəsi ilə nəzərdə tutulmuş əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə, əmlakı müsadirə olunmaqla üç ildən səkkiz ilədək müddətə azadlıqdan məhrum etmə ilə cəzalandırılır.