Sumqayıtda yol nəqliyyat hadisəsi baş verib. Qəza şəhərin mərkəzində, Sülh və Nəriman Nərimanov küçələrinin kəsişməsində, Yapı Kredi Bankının qarşısında baş verib. Belə ki, hadisə şahidlərinin məlumatına əsasən, 5 saylı marşrut avtobusunun sürücüsü idarəetməni itirərək adıçəkilən bankın binasına girib. Əldə etdiyimiz məlumata görə sürücü sərxoş olub, avtobusda 1 qadın sərnişin də olub. Xoşbəxtlikdən xəsarət alan olmayıb. Əməkdaşımızın hadisə yerindən çəkdiyi fotoları təqdim edirik.
Xeberle.com
Fotolar Vüsal Sarıyevindir
P.S. Əslində Sumqayıtın xiyabanlarında - iki yol arasında tikilən banklar və digər obyektlər bir növ təhlükə mənbəyidir və bu tikililərə icazə verənləri kəskin şəkildə qınayırıq. Xatırlayırsınızsa, dəfələrlə Nəriman Nərimanov küçəsi boyunca tikilən obyekt sahiblərini, bu işə rəvac verənləri tənqid etmişik. Artıq N.Nərimanov küçəsi boyunca uzanan xiyabanda - 4 bank qarışıq - azı 10 obyekt var. Bu yerlər avtomobil parkinqləri üçün çox əlverişsiz olması ilə yanaşı, insanlar üçün də çox narahat, hətta təhlükəlidir. İstənilən ani bir qəza insan həyatının sonu ola bilər. Çünki bu obyektlərin bəzisi demək olar ki, yola bitişik tikilib, heç 2 metr səki məsafəsi yoxdur. Obyektlərə daxil olmaq üçün bir çox yerlərdə yolu keçmək üçün müvafiq zebralar, keçidlər yoxdur, üstəlik, avtomobil sıxlığı bu işə ikiqat mane olur.