Xeberle.com-un araşdırmasına görə, Sumqayıt səhrasında nəhəng sənaye komplekslərinin yaradılmasında və yeni bir şəhərin ucaldılmasında ilk gündən əmək kollektivlərində çiyin-çiyinə, əl-ələ verərək ilk yaşayış evini, uşaq bağçasını, məktəb binasını və ilk mədəniyyət evini ucaldan insanlar müxtəlif millətlərin nümayəndələri olublar.

Sumqayıt şəhərini qurub yaradan və burada yaşayan əhalinin milli tərkibi haqqında müxtəlif məlumatlar var. Sumqayıt əhalisinin milli tərkibi Sovet dönəmində siyahıyaalma sənədlərində belə göstərilir:

1959-cu ildə - 10 millətin;

1970-ci ildə - 15 millətin;

1979-cu ildə - 77 millətin;

1989-cu ildə isə - 81 millətin nümayəndəsi yaşayıblar.

Beləliklə, tikinti işləri başlanan ilk gündən etibarən Sumqayıtda əhalinin tərkibi çoxmillətli olmuş, şəhər statusu aldıqdan cəmi 40 il sonra burada artıq 81 millətə və etnik qrupa mənsub olan insanlar yaşayıblar.

Ölkəmiz müstəqillik əldə etdikdən sonra Sumqayıtın ölkə həyatında özünəməxsus yer tutması təkcə onun yaranma tarixi, respublika iqtisadiyyatında mühüm rolu ilə kifayətlənmir. Bu şəhəri fərqləndirən əsas cəhətlərdən biri və bəlkə də başlıcası burada formalaşan təkrarsız mühitdir. Sumqayıt Vətənimizin bir çox bölgəsindən təşrif buyurmuş insanların mehriban ailəsinin məskənidir. Azərbaycanın hansı yerindən gəldiyinə fərq qoymadan hər bir insanı ağuşuna alan bu şəhərdə möhkəm qardaşlıq və dostluq özünün parlaq ifadəsini tapıb.

Rəsmi statistikaya görə, hazırda şəhər əhalisi 333,6 min nəfərdir.

Milli tərkibə gəldikdə isə, əhalinin 95,7%, azərbaycanlılar, 1,7% ruslar, 0,3 %, ukraynlar, 0,3 %, tatarlar, 0,1% yəhudilər, 1,9% isə digər xalqların nümayəndələri təşkil edir.

Göründüyü kimi 26 ildə əhalinin milli tərkibi kifayət qədər dəyişib.

Ramil Zeynallı

Xeberle.com