Sumqayıtın səhiyyə sistemində xoşagəlməz halların mövcudluğu barədə dəfələrlə bəhs etmişik.

Belə görünür ki, bu neqativ hallar tam olaraq aradan qalxmayıb. Yenə də bir qisim xəstəxanalarda "şıdırğı alver” gedir. Belə ki, heç bir qeydiyyat aparılmadan, qəbz verilmədən istər analizlər, istərsə də rentgenlər "cibə pul basma yolu" ilə həyata keçirilir. Bu da haqlı olaraq şəhər sakinlərinin narazılığına səbəb olur.
Bir müddət öncə şəhər İcra Hakimiyyətinin başçısı Zakir Fərəcov Sumqayıtın səhiyyə sistemində olan neqativ halların aradan qaldırılması üçün sözügedən idarənin müdiri Ələkbər Tağıyevə ciddi tapşırıqlar vermişdi. Qeyd edilmişdi ki, rüşvət halları bu gün ən çox doğum evlərində, cərrahiyyə əməliyyatları aparılan xəstəxanalarda baş verir.
Aparılan yoxlamalardan və vətəndaşların çoxsaylı şikayətindən sonra nəhayət ki, doğum evlərindən birinin - 2 saylı doğum evinin baş həkimi İmmi Ələkbərova işdən azad edilidi. Ancaq adı qanun pozuntularında çəkilən 1 nömrəli doğum evinin baş həkimi Sevda İsgəndərova vəzifədə qalası oldu: ciddi xəbərdarlıqdan sonra və işində ciddi dönüş yaratması şərtilə. Belə ki, bir neçə gün öncə 5 nömrəli uşaq poliklinikasının baş həkimi Xəqani Tahirov işdən kənarlaşdırılıb. Amma şəhər sakinlərinin ən çox narazı və şikayətçi olduğu bəzi səhiyyə ocaqlarının baş həkimləri hələ də vəzifələrinin başındadırlar.
Məsələn, bir neçə il öncə ölkə başçısının birbaşa diqqəti və qayğısı nəticəsində təmir olunan, müasir avadanlıqlarla təchiz olunan şəhərin əsas tibb ocaqlarından sayılan Sumqayıt şəhər 1 saylı xəstəxanasından portalımıza tez-tez şikayətlər daxil olub. Xəstəxananın baş həkimi Nazim Hüseynquliyevin şəxsən bu işlərə rəvac verməsi söylənilir.
Bu qədər narazılıqlar və özbaşınalıqlar fonunda Ələkbər Tağıyevin gözdən pərdə asmaq priyomları, "qurban” axtarışları yəqin ki, çox davam edə bilməz. Çünki rüşvətxorluğa və korrupsiyaya qarşı aparılan mübarizə ölkə başçısının ən çox diqqətində olan məsələdir. Həmçinin yeni icra başçısı Zakir Fərəcov da bu məsələ ilə bağlı ciddi tədbirlərə başlayıb. Yəqin bunu səhiyyə müdiri bilməmiş deyil. (moderator.az)