Bu gün Sumqayıt şəhər İcra Hakimiyyətində cari ilin birinci rübünün yekunları ilə bağlı hesabat konfransı keçirilib. Hesabatda şəhər İcra Hakimiyyətinin başçısı Zakir Fərəcov bir çox məsələlərə toxunaraq müvafiq təklif və iradlarını bildirib. İcra başçısı şəhər ictimaiyyətinə yenə təhsil şöbəsinin müdiri Ruhiyyə Tağıyevanı təqdim edərək ona tapşırıqlarını verib. Təhsildə olan neqativ hallara toxunan Zakir Fərəcov bildirib ki, məktəblərin bəzilərində nizam intizamsızlıq mövcuddur: "11-ci siniflər demək olar ki, dərsə gəlmirlər. Bəzən bu cür hallara müəllimlərin özləri rəvac verirlər. Ruhiyyə xanım, bu tip problemlərə son qoymaq lazımdır. Əgər yaxşı işləsəniz, olacaqsınız yaxşı müdir. Amma işləməsəniz, mən sizi işdən azad edəcəm. Bu bizim şərtimizdir. Yoxlama qrupu hazırlayın. Problemləri aradan qaldırın. Həmçinin bağçalara da nəzarət gücləndirilsin. Sumqayıt təhsili həmişə ölkədə ön sırada olub. Son illər şəhərimizin təhsilində geriləmə var. Bu, bizim üçün çox önəmli sahədir. Ona görə də təhsilə maksimum diqqət ayrılmalıdır”, - deyə icra başçısı söyləyib.
Xeberle.com