Sumqayıtın yüksək bal toplayan abituriyentləri ilə müsahibələrimizi davam etdiririk. Budəfəki qonağımız Sumqayıt şəhər 1 saylı orta məktəbin 695 balla ali məktəbə qəbul olan məzunu, şəhər üzrə 2-ci nəticə göstərən Aytən Rafiq qızı Hacıyevadır. Dəfələrlə ölkə miqyasında keçirilən bilik yarışlarının qalibi olub. Ölkədən kənarda bayrağımızı dalğalandırıb. Onunla uğurlarından, ali məktəbə hazırlığından, musiqidən və doğma Sumqayıtdan söhbətləşmişik. Xeberle.com həmin müsahibəni təqdim edir:
HAŞİYƏ: Aytən Rafiq qızı Hacıyeva 1998-ci il avqustun 5-də Sumqayıt şəhərində ziyalı ailəsində anadan olub. Atası özəl şirkətdə mühasib vəzifəsində, anası Sədaqət Hacıyeva isə 5 saylı orta məktəbdə müəllimə işləyir. 2005-ci ildən Sumqayıt şəhər 1 saylı orta məktəbə daxil olub. Bu il həmin məktəbin məzunu olaraq ali məktəbə imtahan verərək 695 balla tələbə adını qazanıb.
- Musiqiyə bağlısan, bu istək səndə uşaq vaxtından formalaşıb?

- Demək olar ki, lap körpə vaxtımdan. Belə ki, bibim fortepianoda, atam kamançada ifa edir. Nənəm həm musiqi, həm də ibtidai sinif müəlliməsidir. Evimizdə kitab və musiqi həmişə vəhdət təşkil edib. Mən də bununla qidalanaraq böyümüşəm. 1 saylı Qara Qarayev adına musiqi məktəbində əvvəl fortepiano üzrə, daha sonra Bakıda Tofiq Quliyev adına musiqi məktəbində vokal üzrə təhsil almışam. Musiqi ilə yanaşı, şeir və müxtəlif mövzularda inşalar yazıram. İnşa müsabiqələrində iştirak etmişəm. Dəfələrlə fənn olimpiyadalarının iştirakçısı olmuşam.

- Yarışlarda nə vaxtdan iştirak etmisən?

- Bir dəfə musiqi məktəbində dil və mədəniyyət festivalı haqqında bir elan gördüm. Yarışa qatılmaq üçün müraciət etdim. Həm şeir, həm də vokal birinciliyi idi. Hər iki sahədə özümü sınamaq istədim. Musiqidə daha çox nailiyyət əldə etdim.

- İlk səfər hara oldu?

- İlk olaraq Türkiyənin 12 şəhərində konsert verdik. Keçən il isə Albaniyanın paytaxtı Tiranada yarışa qatıldım. Türkiyədən fərqli olaraq burada öz dilimizdə mahnı oxudum. Bir maraqlı faktı da qeyd edim ki, Türk dili və ədəbiyyatından bir ay hazırlıq keçdikdən sonra onlayn imtahan verərək Dünya 3-cüsü oldum.

- Əsasən hansı fənn üzrə olimpiadalarda iştirak etmisən?

- Azərbaycan dili və ədəbiyyat. Bu fənn üzrə suallara cavab vermək mənə həzz verir.

- Uşaqlıq dövründə kim olmaq istəmisən?

- Uşaqlıqdan mənim ən böyük arzum hüquqşünas olmaqdır. Hazırda da bu arzum çin olduğundan üçün çox xoşbəxtəm. Özümü beynəlxalq arenada Azərbaycanın hüquqlarını qoruyan şəxs kimi təsəvvür edirəm. Hətta məktəb illərində belə bu yöndə bir neçə addımlar da atmışam. Şagird olmağıma baxmayaraq yüksək vəzifəli insanların iştirakı ilə keçirilən konfranslarda hüquq mövzusunda dəfələrlə iştirak edib məruzə etmişəm. Mövzularım əsasən vətəndaş cəmiyyəti ilə bağlı olub.

 

- Bu uğurların əldə olunmasında daha çox kimin əməyi var?

- Əldə etiyim uğurların altında ilk növbədə valideynlərimin imzası var. Onlar hər zaman arxamda dayanıb.

- Bəs müəllimlər?

- Təbii ki, müəllimlərin əməyi danılmazdır. Hər bir idmançının arxasında necə ki, güclü məşqçi dayanır, mənim uğurum da müəllimlərin verdiyi təhsillə bağlıdır. Buna görə hər birinə minnətdarlığımı bildirirəm.

- Hazırlıq prosesi necə keçdi, hər hansı məhdudiyyətlər vardı?

- Müəllim yanına getməkdənsə, evdə kitab oxumaq daha yaxşıdır, məncə. Çünki yolda bir müəllim yanından çıxıb digərinə getmək çox vaxt aparır. Hətta bir müddət hazırlığa getmədən evdə oturub olimpiadada da iştirak etmək üçün hazırlaşmışam. Mən həm ictimai işlə məşğul olmuşam, həm dərsimi oxumuşam. Bilirsiniz, aşağı siniflərdə təməl güclü olduğuna görə yuxarı siniflərdə hazırlıq prosesi mənim üçün təkrar etmək, xatırlatma kimi idi.

 

- Cəmi bir suala yanlış cavab verməyinə səbəb nə oldu? Hansı sual idi?

- Əslində 700 balın xəyalları ilə yaşayırdım. Evdə hər yerə 700 yazıb asmışdıq. Çox heyf, bir sual məndə "göz muncuğu” oldu. İngilis dili üzrə 2-ci suala düz cavab vermədim. Hazırlıq dövründə çətin suallar üzərində çox işlədim. Bu, sadə sual idi. Hətta imtahandan çıxanda elə bilirdim ki bütün suallara düzgün cavab vermişəm. Yoxlatdıranda isə müəllimə dedi ki, bir sualda səhv etmisən. Heyf, diqqətsizliyim ucbatından 700 baldan məhrum oldum.

- Haqqında maraqlananda məlum oldu ki, musiqiyə böyük həvəsin var. Hətta Youtube social şəbəkəsində bir çox oxuduğun mahnınıı dinləmək olar. İlkin olaraq fikirləşdim ki, sənədlərini İncəsənət Universitetinə verəcəksən. Amma hüququ seçdin. Bu istək necə formalaşdı səndə?

 

 

- Bu sahəyə marağı atam oyadıb. Məktəbə getdiyim dövrdən, ictimai həyatda özümü göstərəndən bu yana məni hüquqşünas kimi görürdü. Hətta deyirdilər ki, qız hüquqşünas olmaz, amma atam həmişə mənim arxamda dayanıb. Həmişə deyirdi ki, Konstitusiya Məhkəməsinin 9 hakimindən biri sən olacaqsan.

- Təhsili və əldə etdiyin nailiyyətləri bir kənara qoysaq, daha nələr səni maraqlandırır?

- Çox istəyirəm ki, moda sahəsində Azərbaycan brendi yaradım. Çox istəyirəm ki, Milan, Nyu-York, London kimi Bakı və Sumqayıt da dəb mərkəzinə çevrilsin. Dünyaca məhşur "Armani”, "Gucci” kimi brendlərə baxanda paxıllığım tutur. Bundan əlavə, hədsiz dərəcədə futbola marağım var. Azarkeşlik etdiyim komanda isə "Qarabağ”dır.

- Sumqayıtla bağlı nə deyə bilərsən. Bir gənc kimi səni qane edirmi şəhərimiz?

- Bir gənc kimi çox xoşbəxtəm ki, sumqayıtlıyam. Bu şəhər mənə çox doğmadır. Çox istərdim ki, şəhərin tanıtım mərkəzi olsun. Ümumiyyətlə gənclərdən ibarət kreativ bir birlik də yaradıla bilər. Bu, şəhərimizin inkişafı üçün faydalı, mütərəqqi ideyalar vermək baxımından çox vacibdir. Beləliklə, şəhərimizi dünyaya tanıdaq.

 

Sonda Xeberle.com-a mənə vaxt və diqqət ayırdığı üçün minnətdarlığımı bildirirəm. Özümdən sonra gələn şagirdlərə isə tövsiyə edərdim ki, hansı peşəni seçirlər seçsinlər, hansı ali məktəbə qəbul olurlarsa olsunlar, ilk növbədə vətənin, millətin, valideynlərin başını uca etsinlər, onlara layiqli övlad olsunlar, peşəkar mütəxəssis kimi yetişsinlər.

Söhbətləşdi: Kamal Almuradlı

Foto: Kamran Kazımzadə

 

Xəbərdən istifadə edərkən istinad etmək vacibdir.