Sumqayıt Tibb Mərkəzinin keçirdiyi minifutbol turnirin qalibi məlum olub.
TƏBİB-in tabeliyindəki Sumqayıt Tibb Mərkəzinin (STM) nəzdində olan tibb müəssisələri arasında keçirilən minifutbol turniri başa çatıb.
Xeberle.com xəbər verir ki, "Heydər Əliyev İli” çərçivəsində keçirilən və STM-in 8 tibb müəssisəsinin mübarizə apardığı minifutbol turnirinin qaliblərinin mükafatlandırılması mərasimi keçirilib.
İlk olaraq STM-in İctimaiyyətlə əlaqələr bölməsinin müdiri Ramil Zeynallı turnirin gedişi və nəticələri barədə məlumat verib.
STM-in direktor müavinləri İlkin Namazov, Maisə İsmayılova, Arzu Bəndəliyeva, Ümumi şöbənin müdiri Aynur Həsənova və Sumqayıt Səhiyyə İşçiləri Həmkarlar İttifaqı Şurasının sədri Elmira Quliyeva isə çıxış edərək ölkəmizdə Heydər Əliyev irsinin təbliği istiqamətində görülən işlərdən və dövlətimizin idman siyasətindən danışıb.
Çıxışlardan sonra qaliblərin mükafatlandırması həyata keçirilib. Turnirin qalibi olan Təcili Təxirəsalınmaz Tibbi Yardım Stansiyasının komandası kubok, fəxri fərman, medal və pul mükafatı, II yeri tutan 3 və 4 nömrəli şəhər xəstəxanalarının birgə komandası isə fəxri fərman və medallarla mükafatlandırılıb.
Digər komandalara isə təşəkkürnamələr verilib.
Qeyd edək ki, minifutbol turniri Sumqayıt Tibb Mərkəzinin təşkilatçılığı və Sumqayıt Səhiyyə İşçiləri Həmkarlar İttifaqı Şurasının dəstəyi ilə keçirilib.
Yarışda 8 komanda olmaqla 64 nəfər səhiyyə işçisi iştirak edib.
Xəbərdən istifadə edərkən istinad etmək vacibdir.
