Bildiyimiz kimi möhtərəm Prezidentimiz İlham Əliyev 2019-cu ili Azərbaycanda "Nəsimi İli” elan edib və bunu da Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında bildirib. Həmçinin "Böyük Azərbaycan şairi İmadəddin Nəsiminin 650 illik yubileyinin qeyd edilməsi haqqında” ölkə başçısının müvafiq sərəncamı ilə Nazirlər Kabinetinə müvafiq tədbirlər planının hazırlanıb həyata keçirilməsi tapşırılıb.

Mən möhtərəm Prezidentimizin bu addımını alqışlayır, öz adımdan, qələm dostlarım adında və bütün poeziyasevərlər adından ölkə başçısına dərin təşəkkürümü bildirirəm.

Həmçinin 2019-cu ilin ölkəmizdə "Nəsimi İli” elan edilməsi fürsətindən istifadə edərək bir təklif irəli sürmək istəyirəm.

 

Bildiyiniz kimi, Sumqayıtda Nəsimi adına Mədəniyyət və istirahət parkı var. Bu mədəniyyət və istirahət parkı 1967-ci ildə yaradılıb, 1978-ci ilin avqust ayında isə görkəmli Azərbaycan şairi İmadəddin Nəsiminin adı verilib. Bu park təxminən 80 hektarlıq bir ərazini əhatə edir və demək olar ki, respublika üzrə ən gözəl istirahət və mədəniyyət parklarından biri sayılır. Buna görə də Nazirlər Kabinetinin qərarı ilə 2001-ci ildə Nəsimi adına mədəniyyət və istirahət parkı ölkə əhəmiyyətli tarixi və mədəniyyət abidələri siyahısına daxil edilib. Bu baxımdan, sumqayıtlılar belə bir parka sahib olduqlarından çox məmnundurlar

Amma etiraf etmək lazımdır ki, bu parkın yaxınlığında dahi şairimiz İmadəddin Nəsiminin şərəfinə ucaldılmış abidə onun adına və şəninə layiq deyil. Və düzünə qalsa, buna abidə də demək olmaz.

Keçirəm əsas mətləbə. 2019-cu il "Nəsimi İli” elan edildiyindən bütün bögələrimizdə olduğu kimi Sumqayıtda da güman ki, bütün mədəniyyət ocaqları, ictima və yaradıcı birliklər, təşkilatlar, idarə və müəssisələr tərəfindən də silsilə tədbirlər keçiriləcək və bu tədbirlərə istər-istəməz müəyyən vəsaitlər sərf olunacaq.

Mən təklif edirəm ki, bu vəsaitlər bir araya toplansın, həmçinin bütün Sumqayıt ziyalıları, iş adamları, imkanlı şəxslər, sumqayıtsevərlər də bir araya gələrək könüllü şəkildə bu kampaniyaya maddi dəstək versinlər və müəyyən miqdar vəsait toplansın. Elə həmin vəsait hesabına, elə həmin məkandaca dünyaşöhrətli şairin adına yaraşan əzəmətli bir abidə ucaldılsın. "Nəsimi İli” ərzində də Sumqayıtda cəmi bir tədbir keçirilsin, o da heykəlin təntənəli açılış mərasimi.

Güman edirəm ki, bu addım "Nəsimi İli”nin ən yaddaqalan hadisəsi olar və inanıram ki, bütün Sumqayıt sakinləri – hamı bir nəfər kimi bu addımı dəstəkləyər.

Rafiq ODAY,
Azərbaycan Jurnalistlər Birliyi 
Sumqayıt şəhər təşkilatının sədri,
Respublikanını Əməkdar jurnalisti,
şair-publisist

Xəbərdən istifadə edərkən istinad etmək vacibdir.