Xeberle.com olaraq uşaqların dünyagörüşünün formalaşmasında, əqli və fizioloji inkişafında uşaq ədəbiyyatının və uşaqlara ünvanlanan teleproqramların necə rol oynaması, həmçinin azərbaycanlı uşaqların bizim personajları deyil, məhz xarici uşaq personajlarını sevmələrinin səbəbini araşdırmağa çalışıb.

Niyə azərbaycanlı uşaqlar bizim personajları deyil, xarici uşaq personajlarını sevirlər?

Uzun illər bu sahədə müxtəlif sahələrdə çalışan "Göy qurşağı" uşaq jurnalının redaktoru, uşaq yazarı Sevinc Nuruqızı Xeberle.com-a açıqlamasında bildirib ki, Azərbaycan uşaq ədəbiyyatında silsilə xarakterli əsərlər olmadığından uşaqlarda əcnəbi personajjlara qarşı maraq yaranır: "Azərbaycan uşaq ədəbiyyatında silsilə xarakterli əsərlər yoxdur. Məsələn ən azı 20-30 bölümdən ibarət nağıl-povestlər. Uşaq davamlı xatırlanan obrazları sevir və yaddaşında saxlayır. Düşünmürəm ki, tək bir hekayənin qəhrəmanı uşaqların yaddaşında Karlson, Uzuncorab Peppi, Balaca Şahzadə, Harri Potter və s. obrazlar kimi qala bilər. Həm də hər hansı uşaq ədəbiyyatı nümunəsinin yaddaşlarda qalması üçün onun əsasında cizgi filminin, bədii filmin çəkilməsi, bu obrazın brendə çevrilməsi lazımdır - onun təsvirinin uşaq məişətinə aid əşyaların, oyuncaqların, məktəb və dəftəxana ləvazimatlarının üzərində mütəmadi görünməsidir. Yəni hər bir halda obrazların uşaq yaddaşına həkk olunması üçün əsərin reklamı, yayınlanması, böyük tijajla çapı önəmli rol oynayır. Bizim uşaq kitablarımız isə 500-1000 tirajla çap edilir. Bu halda inanmıram ki, yaxın onilliklərdə Azərbaycan uşağının sevimli nağıl və macəra qəhrəmanı olsun. Bu çox əhatəl söhbətin mövzusudur. Saatlarla danışmaq olar."

S. Nuruqızı vurğulayıb ki, uşaqların dünyagörüşünün hərtərəfli inkişafı üçün keyfiyyətli və uşaqların sevəcəyi maarifləndirici və əyləndirici proqramların hazırlanması əsas faktorlardan biridir. Yazar deyib ki, öncə efir məkanını süni uşaq verilişlərindən təmizləmək lazımdır: "Robot kimi valideyn diktəsi ilə dindirilən uşaqlarla hazırlanan veriliş uşaq verilişi deyil. Bu verilişlərdə öndə valideyn durur. Öz düşüncəsi ilə uşağını efirə hazırlayan valideyn. Heç parıltılı paltarlarla, makiyaj və yaşından böyük aksesuarlarla o kanaldan bu kanala keçən uşaqlar da Azərbaycan uşağının mənzərəsini yaratmır. Biz özümüzü aldadırıq. Və ya uşaqlarımızı varlı sponsorlar tapıb yararsız verilişlər hazırlayan işbazların zərərli fəaliyyətinə qurban veririk."

Elnarə Salamova

Xeberle.com