Novruz xalqımızın çox sevdiyi bayramlardan biridir. Azərbaycanın milli
bayramlarından olan Novruz hər il ölkəmizdə təmtəraqlı şəkildə qeyd olunur. Bu
bayramın ən böyük özəlliyi isə adət-ənənələri ilə yaddaşımıza həkk olunmasıdır.
İstər böyük, istərsə də kiçik olsun, hər birimizin Novruz bayramı ilə əlaqədar
gözəl, maraqlı, unudulmaz xatirələri vardır.
Bəs Sumqayıtın məmurları bu bayramla
bağlı hansı maraqlı hadisələri xatırlayırlar? Elə bunu öyrənmək üçün Xeberle.com olaraq şəhərimizin məmurları arasında kiçik sorğu keçirdik.
Mehman
Şükürov, Sumqayıt Regional Mədəniyyət və Turizm İdarəsinin rəisi: "Bütün
bayramlar gözəldir, amma mən onlardan ən çox üçünü sevirəm: 8 Mart Beynəlxalq
Qadınlar Günü, Novruz və Qurban bayramlarını. Novruz bayramı ilə əlaqədar bizim
yaşda olanların ən çox yadlarında papaqatma, yumurta döyüşdürmə, tonqalın
üstündən tullanma və s. kimi ənənələr qalıb. Yadımdadır ki, 2-ci və ya 3-cü
sinifdə oxuyardım, tonqaldan tullanarkən içinə düşmüşdüm və boynum yanmışdı.
Plovu rahat yeyə bilmədim (gülür)”.
Mübariz
Bəşirov, Sumqayıt şəhər Gənclər və İdman Baş İdarəsinin rəis əvəzi : "Uşaq
yaşlarından boksa getmişəm, nə varsa boks silib aparıb. Heç nə yadımda
qalmayıb”.
İndira
Şəmsivari, Sumqayıt şəhər Maliyyə İdarəsində 2-ci dərəcəli dövlət qulluqçusu:"Mən Maliyyə İdarəsində çalışmaqla yanaşı, 5 saylı tam orta məktəbdə
iqtisadiyyatdan dərs demişəm. 1-ci saat həmin təhsil ocağına dərs keçməyə
gedirdim, 9-a qalmış 25 dəqiqə gəlib işə çatırdım. Dərs keçdiyim 10-11-ci
siniflərimlə səmimi münasibətimiz yaranmışdı. Başqa vaxt repetitor yanına gedən
11-ci siniflər mənim dərsimə gəlirdilər. Hətta məktəbin direktoru da deyirdi
ki, kaş sizin 6 saat dərsiniz olardı və repetitor yanına gedən bütün şagirdlər
dərsə gələrdilər. Mən ümumiyyətlə bayramda qapıya atılan heç bir papağı boş
göndərməmişəm. Çalışmışam ki, az da olsa, nə varsa, papaqlara qoyum. Axır çərşənbələrin
birində yenə qapı döyüldü. Yoldaşım heç vaxt papaq üçün qapıya getmirdi, mən
gedirdim. Qapını açanda gördüm ki, haradasa 14-15 papaq sıra ilə düzülüb. Həmin
an qapını bağladım və düşündüm ki, papaqlara qoymağa mənim o qədər ehtiyatım
yoxdur. Amma onları boş da göndərə bilməzdim. Papaqlara nə qoyacağımı düşünərək
ikinci dəfə qapını açanda gördüm ki, mənim 11A sinif şagirdlərim orada
dayanıblar, mənə dedilər ki, "müəllimə, sürpriz". Bu, doğrudan da mənim
üçün həmin çərşənbənin ən gözəl sürpirzi oldu".
Gülnarə
Cəmaləddin, Azərbaycan Yazıçılar Birliyinin (AYB) Sumqayıt şəhər Şöbəsinin sədri:"Uşaqlığımızda Novruz bayramını çox gözəl keçirirdik. Baxmayaraq ki, Sovet
dövrünün çətinlikləri, qadağaları var idi. Mən uşaqlığımı Yardımlı rayonunun Bərzan
kəndində keçirmişəm. Yadımdadır ki, bayramda bizə təzə paltarlar alınardı, tonqal
qalayıb üzərindən tullanardıq. Tonqaldan kimsə tullanmayanda elə bilirdik ki,
bu ilin ağrı-acısı növbəti ilə də keçəcək. Uzaq adamlara deyil, qonum-qonşuya
qızlar yaylıq, oğlanlar da papaq atardı. Onlar da papağa şirniyyat, pul
qoyardılar”.
Qurban
Mikayılov, Sumqayıt şəhər Su Kanal İdarəsinin rəis müavini: "Novruz bayramında
oğlanlar ayrı, qızlar ayrı səhərə qədər yuxusuz qalır, bir-birimizin yeməyini
oğurlayırdıq. Həmin ənənəyə qədirsaxlama deyilirdi”.
Cümşüd
İsmiyev, Sumqayıt Şəhər "Lift-Servis” Birliyinin rəisi: "Mən uşaq vaxtı da,
böyüyəndə də tam müstəqil olmuşam. Uşaq olanda mən böyük kimi hərəkət edirdim.
Biz papağı atanda da öz evimizə atmışıq, başqasının qapısına papaq
atmamışıq"
Şamil
Abbasov, Sumqayıt şəhər Avtovağzalının müdiri: " İllər ötüb. Heç nə yadımda qalmayıb”.
Elnarə
Salamova
Xeberle.com
Xəbərdən istifadə edərkən istinad etmək vacibdir.
