"Millət vəkilinin orta məktəblərdə əməkhaqların artırılması üçün müəllimlər arasında ixtisarların aparılması təklifi heç bir halda qəbul ediləcək təklif deyil”.

Bu sözləri təhsil eksperti Məlahət Mürşüdlü millət vəkili Siyavuş Novruzovun "orta məktəblərdə müəllimlər ixtisar edilsin, maaşlar artırılsın” fikirlərinə münasibət bildirərkən deyib.

Ekspert qeyd edir ki, müəllimlərin maaşlarının artırılması üçün kütləvi ixtisarlara ehtiyac yoxdur:

"250 min müəllimin normal əmək haqqı alması üçün gərək onlardan heç olmasa 125 mini ixtisar edilsin. Bu qeyri-mümkündür. İxtisarın səbəbləri olmalıdır. Əgər ixtisar edilməyə səbəb varsa, bu mütləq araşdırılmalı və ancaq bundan sonra hansısa işdən çıxarılmalar ola bilər. Ancaq nə qədər ixtisar aparılmalıdır ki, fəaliyyətini davam etdirəcək müəllimlərin əmək haqlarında hiss ediləcək artım olsun. Millət vəkilinin bu təklifi heç bir halda düzgün addım deyil”.

M.Mürşüdlü əlavə edir ki, müəllimlərin əməkhaqlarının artımı üçün yeni mexanizmlər axtarılmalıdır:

"Sınaq qiymətləndirmələri, müsabiqələr, attestasiyalar keçirilir. İlin ən yaxşı müəllimi, məktəbi kimi müsabiqələr təşkil edilir. İşi bu istiqamətdə aparıb nəticə olaraq həmin adları qazanmış müəllimlər dəyərləndirilməli, əmək haqları qaldırılmalıdır. Bundan başqa, bir başa müstəqil bir qurum yaradıla bilər ki, orada müəllimlərin attestasiyası keçirilsin. Və yüksək əməkhaqqı almaq istəyən müəllimlər könüllü olaraq attestasiyadan keçib nəticələrinə görə əmək haqlarını artırılmasına nail ola bilərlər”.

Ekspert heç bir ölkədə müəllimlərin əmək haqlarının qaldırılması üçün ixtisarlar aparılmadığını bildirir. Bu sahədə xarici təcrübədən danışan ekspert əlavə edir ki, hər ölkənin məsələyə müxtəlif yanaşması var:

"Mən Avropa ölkələrinin təcrübəsindən deyil, qonşu ölkələrin təcrübəsini qeyd etmək istəyərdim. Qazaxıstanda müəllimlərin həyat şəraitinin yaxşılaşması üçün onlar mənzillə təmin edilir. Həmçinin, peşəkarlıq səviyyəsinin artırılması məqsədilə müəllimlərin əsas iş vaxtından sonra öz ixtisası üzrə repetitorluq etməsinə də qanunla izn var. Gürcüstanda  agentliklər tərəfindən lisenziyalaşdırma aparılır. Hər bir müəllim özünün peşəkarlıq səviyyəsinə görə də əməkhaqqı alır. Türkiyə təhsil sistemində isə təqaüdə çıxan müəllimlərə işlədiyi illərin toplam əmək haqqı verilir. 25 ildir pedaqoji fəaliyyətlə məşğul oluramsa, bu 25 il ərazində aldığım əməkhaqqı məbləğində təqaüd almalıyam. Azərbaycanda da belə olsa, təqaüd yaşına çatan heç bir müəllim dərs deməz. Artıq ixtisarlara da ehtiyac olmaz. Bu səbəbdən Türkiyədə 70-80 yaşlı müəllimlər yoxdur. Bu gün bu qaydanı Azərbaycanda da tətbiq etməyə hər bir imkan var. Bu tip humanist ixtisarların edilməsi daha yaxşı olardı. Bu gün Azərbaycanın iqtisadi vəziyyəti imkan verir ki, heç bir ixtisarlar aparılmadan müəllimlərin əmək haqları qaldırılsın. Müəllimlərin kütləvi şəkildə ixtisarı etirazlara, narazılığa və xaosa səbəb ola bilər”.