Mən əslində Ceyhunu qınamıram. Ceyhunla münasibətimiz də yaxşıdır, ola bilsin özü də bu yazdığımı oxusun. Bilirəm ki, istər Ceyhun, istərsə də Kamran Quliyev "Sumqayıt”da əsl peşəkar kimi, vicdanla, məsuliyyətlə çalışıblar. Problem onlarla bağlı deyil, problem Sumqayıt futbolunu bu statusa salanlardadı. Problem AFFA rəhbərliyində, Elxan Məmmədovdadı. Hansı ki, bu boyda şəhərin futbolunu öz monopolyalarına alıb bu günə salıblar. Hər zaman demişəm, nə vaxta qədər Sumqayıt futbolunun, Sumqayıt klubun başında sumqayıtlı dayanmayacaq Sumqayıt futboluna bu statusdan yanaşacaqlar. Samir Abasovun Kamran Quliyevin "Neftçi”yə keçidinə bildirdiyi münasibət yadıma düşdü: "Bizim prezident yaxşı idi, ona görə "Neftçi”yə göndərdilər. Demək ki, biz yaxşıya layiq deyilk? Niyə bizi yaxşıya layiq bilmirlər? Artıq klubun gəlıəcəyindən narahatam ki, bəlkə bizim üstümüzdən xətt çəkdilər”.

Bəli, təəssüf ki, durum budur. Yaxşı ki, bu gün Samir və onun məşqçi heyəti sumqayıtlıdır və komandanı hələ də ayaqda saxlayırlar. Məhz sumqayıtlı olduğu üçün Abasov "Sumqayıt”ı atıb "Neftçi”yə getmədi. Çünki onun üçün Sumqayıt klubunun baş məşqçisi olmaq "Neftçi”nin baş məşqçisi olmaqdan az məsuliyyətli deyil. Əminəm ki, nə vaxtsa Samir "Neftçi”yə baş məşqçi getsə belə, heç  vaxt Ceyhun kimi fikir səsləndirməz. 

AFFA bu gün Sumqayıt futbolunu elə statusa salıb ki, bura gələn özünü çox rahat hiss edir. Çünki üzərində Ceyhunun dediyi kimi, "Nefçi”də olan təzyiq yoxdur: əşi, "Sumqayıt”dır da onsuz da qarşısına heç bir hədəf qoyulmayıb alınar alınar, alınmaz da alınmaz. Amma "Neftçi”yə gedən kimi dərhal "Neftçi”nin məsuliyyəti başqadır, "Neftçi” "Sumqayıt” deyil, burda təzyiq hiss edirəm” kimi açıqlamalar verilir. Nəyə görə "Neftçi” "Sumqayıt”dan fərqli klub  olmalıdır? Bəli, "Neftçi” ən tarixi klubdur, SSRİ vaxtı ölkəni ittifaqda təmsil edib, bu gün də bu klubda çalışmaq böyük məsuliyyət tələb edir. Amma bu, o anlama gəlməməlidir ki, sən "Sumqayıt”da rahat işləyə, orda işinə məsuliyyətsiz, başdansovdu yanaşa bilərsən. Bu gün AFFA-da çalışanlar, Sumqayıt futbolunun tarixinə bələd olmayanlar üçün  Sumqayıtda futbolun tarixi 2011-ci ildən başlaya bilər. Amma əsl sumqayıtlılar, əsl sumqayıtlı futbolsevərlər bir vaxtlar burada hansı komandaların, hansı futbolçuların, hansı azarkeşlərin olduğunu gözəl bilir. Ceyhun dostumuz deyir ki, bu gün hamı – azarkeş, sponsor, media - "Neftçi”ni həmişə yüksək yerlərdə görmək istəyir.  Yəni belə çıxır ki, azarkeş, sponsor və media "Sumqayıt”ı yüksək yerdə görmək istəmir. Əslində yaranan görüntü budur. AFFA elə klub formalaşdırıb ki, "Sumqayıt”da sponsordan tutmuş, həkiminə kimi kimi dindirsən deyəcək ki, bizim əsas məqsədimiz yığmalara futbolçu yetişdirməkdi bizim qarşımıza böyük hədəflər qoyulmayıb. Halbuki, bir vaxtlar belə olmayıb.

Sumqayıtlılar yaxşı xatırlayar bir vaxtlar "Xəzər” Sumqayıt var idi.  Hansı ki, "Neftçi” milli çempionatlarda ilk böyük hesablı məğlubiyyətini məhz həmin "Xəzər”dən almışdı. Heyətinin yarısı 16-18 yaşlı futbolçulardan ibarət olan komanda iki il ard-arda ölkə çempionatının gümüş medallarını qazanmışdı. Bir dəfə isə 4-cü pilləni tutmuşdu. İndiki reqlamentlə həmin nəticə ard-arda 3 il avrokuboklara vəsiqə demək idi. Həmin komandadan sponsor da, azarkeş də, media da yüksək yerlər tələb edirdi. Çünki bütünlüklə Sumqayıtın olan klub özü qarşısına yüksək hədəflər qoymuşdu. Yadımdadı, 1994-cü ildə "Xəzər” evdə gözlənilmədən "Viləş”lə oyunda xal itirdi (sonradan həmin oyun ətrafında xeyli söz-söhbət yarandı) və 3-cü pilləni tutmaq şansını əldən verdi. Bu günə kimi gözümün qabağındadır ki,  stadiona toplaşmış 10 min azarkeş hakimin final fitindən sonra futbolçulara hansı təzyiqi göstərdi. Hətta bəzi azarkeşlər oyunun gedişində az qala ehtiyat oyunçular skamyasına hücum çəkib baş məşqçi Sabir Əliyevdən "İsmayılı niyə ehtiyatda saxlamısan” sualına cavab tələb edirdi. Həmin mövsüm 16 komanda arasında 4-cü yer Sumqayıt azarkeşləri üçün ən uğursuz nəticə sayıldı. Amma AFFA bu gün həmin Sumqayıt futbolunu elə günə salıb ki, 8 komanda arasında 4-cü yer az qala Sumqayıt futbolu üçün Çempionlar Liqasının qrupuna düşəcək səviyyədə  tarixi nəticə sayırlar Halbuki, bir vaxtlar 4-cü yeri tutan Sumqayıt komandasının futbolçuları fitə basılıb, baş məşqçisi istefaya çağırılıb.

"Xəzər”i qoyuram qırağa gəlirəm "Gənclərbirliyi"nə. Hansı ki, "Xəzər”dən fərqli olaraq, bu komanda mövcud olduğu dönəmdə yüksək yer tuta, medal qazana bilmədi. Amcaq həmin komandaya belə, azarkeşlər tərəfindən böyük təzyiq var idi. Bir məşqçi ardıcııl olaraq  bir neçə oyun uğursuz çıxış edirdisə dərhal üzərində təzyiq hiss edirdi. Əgər uğursuz çıxış davam edərdisə tribunadan istefa çağırışını eşidirdi. "Gənclərbirliyi”ndə məhz azarkeşlərin tələbi ilə iki məşqçi istefaya göndərilmişdi. Suraxanıda "Xəzər Lənkəran”a ağır məğlubiyyətdən sonra sumqayıtlı azarkeşlər az qala baş məşqçi Mehmet Tayfun Türkməni didib-parçalayacaqdı. Elə oyundan dərhal sonra istefa verən türkiyəli məşqçi gecə ilə ölkəni tərk etdi. Amma indiki "Sumqayıt” yarandığı gündən autsayder olduğu halda hələ bu günə qədər bir dəfə də olsun nə baş məşqçisi, rəhbəri istefaya çağırılıb, nə də futbolçuları fitə basılıb. AFFA Sumqayıt futbolunu bu statusa qədər alçaldıb. Yenidən yüksəlməyin tək yolunu isə yuxarıda göstərdim: Sumqayıt futbolu, Sumqayıt klubu birbaşa bu şəhəri sevən, onun futbolunun qədrini bilən, təəssübünü çəkən sumqayıtlıların nəzarətində olmalıdır.

Anar XANLAROV

rekord.az