Təhsil
Nazirliyinin rəsmi xəbərdarlığından sonra Bakı və Sumqayıt şəhərlərində
valideynlər risk etməməyi qərara alaraq, səhər uşaqlarını məktəbə göndərməkdən
imtina ediblər.
Xeberle.com-un məlumatına görə, bu barədə sosial şəbəkələrdə məlumat yayılıb. Bildirilir ki, 30-35
nəfər şagirdin oxuduğu siniflərdə bu gün dərsə 15-20 nəfər gəlib.
O, da qeyd
olunub ki, şagirdlərin dərslərdə olmaması xüsusən ibtidai siniflərdə daha çox
hiss olunub: "Sumqayıt şəhərinin məktəblərinin bir neçə siniflərində
uşaqların gəlməməsi səbəbilə dərslər ləğv edilib."
Məsələ ilə
bağlı Sumqayıt şəhər Təhsil şöbəsi ilə əlaqə saxladıq. Qurumdan Xeberle.com-a yayılan məlumatların həqiqəti əks etdirmədiyi bildirilib: "
Sumqayıt şəhərinin orta ümumtəhsil məktəblərində tədris prosesi əvvəlki günlərdə
olduğu kimi normal qaydada davam edir.
Hava şəraiti ilə bağlı dərslərdə davamiyyətin aşağı düşməsi və bəzi məktəblərin
bir neçə siniflərində dərslərin ləğv edilməsi ilə bağlı yayılan məlumatlar isə şayədir. Sumqayıt şəhər Təhsil şöbəsinin tabeliyində
olan tədris müəssisələrinin heç birində dərslərin ləğv edilməsindən söhbət gedə
bilməz."
Qeyd edək
ki, rəsmi məlumata əsasən, martın 3-dən 31-dək Abşeron yarımadasında hava şəraitinin
qeyri-sabit keçəcəyi, güclü və təhlükəli şimal-qərb küləyinin əsəcəyi gözlənilir.
Elnarə Salamova
Xeberle.com
Xəbərdən istifadə edərkən istinad etmək vacibdir.
