Sumqayıtda ictimai nəqliyyatın təkmilləşdirilməsi istiqamətində bir sıra islahatlar aparılsa da bəzi mövcud problemlər hələ də öz həllini tapmayıb.
Bu problemlər şəhər sakinlərinin Xeberle.com-a ünvanladığı şikayət məktublarında da öz əksini tapır.
Elektron ünvanımıza daxil olan şikayətlərdən biri də Sumqayıtda bağlar istiqamətində hərəkət edən 18 saylı marşrutla bağlıdır. Şikayətdə bildirilir ki, PAZ avtobusları şəhərə gətirilən yeni "İsuzu" avtobusları ilə yenilənəndə çox sevinmişdilər. Amma onların bu sevinci çox çəkməyib:
"Sumqayıt bağları üzrə 18 saylı marşrutun PAZ avtobuslarını yeni İsuzu avtobusları ilə yeniləndi. Əhalinin sevincinin həddi-hüdudu yox idi. Lakin bu sevinc çox çəkmədi. İki gündən sonra yenidən PAZ camaata paz oldu. Natəmiz, qışda soyuq, yayda isti olan bu avtobuslar insanlara diskomfort yaradır. 40 dəqiqədən bir işləyir. Camaat əziyyət çəkir. Uşaqlar məktəbə gedəndə əziyyət çəkir. Köhnə avtobuslarda sıxlıq olur. Xahiş edirik bu problemi geniş işıqlandırasınız."
Məsələ ilə bağlı "Sumqayıt Nəqliyyat" MMC-nin rəisi Xannı Rüstəmovla əlaqə saxlamağa çalışdıq. Həmişəki kimi, telefon zəngimiz cavabsız qaldı.
Buna baxmayaraq aidiyyatı qurumun mövqeyini işıqlandırmağa hazırıq.
Ümidvarıq ki, sakinlərin bu problemi yaxın zamanlarda öz həllini tapacaq.
Xeberle.com
Xəbərdən istifadə edərkən istinad etmək vacibdir.
