Sumqayıtda Azərbaycan Dövlət Neft Şirkətinin
(ARDNŞ) "Azərikimya" İstehsalat Birliyinin (AİB) Müşahidə Şurasına yeni sədr təyin
olunub.
Xeberle.com-un verdiyi məlumata görə,
millət vəkili Muxtar Babayevin əvəzinə təyin olunan yeni sədr Arzumanzadə
İmran Yaqub oğludur.
İ.Arzumanzadə daha öncə "Azərikimya" İB-nin icraçı direktorunun müavini olub.
Qeyd edək ki, İ. Arzumanzadə 19 sentyabr 1965-ci ildə Bakı şəhərində, ziyalı ailəsində anadan olub. Burada 247 saylı orta məktəbdə, daha sonra isə Azərbaycan İnşaat İnstitutunda təhsil alıb. O, İnstitutda körpülər və tunellər istiqaməti üzrə inşaat mühəndisi ixtisasına yiyələnib. 1983-1985-ci illərdə ordu sıralarında hərbi xidmətdə olub. Ordudan qayıtdıqdan sonra əmək fəaliyyətinə başlayıb. 1985-1990-cı illərdə "Azərittifaq” Reklam-İstehsalat kombinatında çilingər, daha sonra inşaat ustası, 1990-1993-cü illərdə "Azəryol” Elmi-istehsalat müəssisəsində mühəndis, 1993-1995-ci illərdə "Azərbaqroimpeks” xarici-iqtisadi assosiasiyasında baş mütəxəssis, daha sonra Təchizatın təşkili şöbəsinin müdiri vəzifələrində işləyib. 2003-2006-cı illərdə Moskva Dövlət Açıq Universitetində hüquqşünas ixtisası üzrə ikinci ali təhsilini alıb. Burada təhsilini bitirdikdən sonra, 2006-2010-cu illərdə SOCAR-ın Heydər Əliyev adına Bakı Neft Emalı zavodunda şöbə rəisi, daha sonra direktorun nəqliyyat və satış üzrə müavini vəzifələrində işləyib. 2010-cu ildən bu günə kimi isə SOCAR-ın "Azərikimya” İstehsalat Birliyində icraçı direktorun satış və satınalmalar üzrə müavini vəzifəsində çalışıb. O, 2015-ci ildə Azərbaycan neft sənayesinin inkişafında xidmətlərinə görə ölkə başçısı tərəfindən "Tərəqqi" medalı ilə təltif edilib.
Qeyd edək ki, "Azərikimya" İB-nin Müşahidə Şurasının əvvəlki sədri, millət vəkili Muxtar Babayev isə prezident İlham Əliyevin sərəncamı ilə Ekologiya və təbii sərvətlər naziri təyin olunub.
Elnarə
Salamova
Xeberle.com
Xəbərdən istifadə edərkən istinad etmək vacibdir.
