Hər bir valideyn övladı müəyyən yaşa gəldikdən sonra istər ehtiyac səbəbindən, istərsə də uşağın ətraf mühitə adaptasiyası olması və inkişafı üçün bağçalara üz tutur. Çox zaman da uşağı aparıb-gətirmək asan olsun deyə valideynlərin müraciəti əsasən yaxın məsafədə yerləşən bağçalara olur. Lakin son illərdə bu, bir müşkülə çevrilib. İstər paytaxtda, istərsə də Sumqayıtda övladını bağçaya qoymaq istəyən valideynlər çox zaman müdirin "yer yoxdur” cavabı ilə üz-üzə qalır və belə olduğu təqdirdə daha uzaq məsafədə yerləşən bağçalara üz tutmağa məcbur olurlar. Sözügedən bağçalarda isə ona qeydiyyatda olduğu ünvana yaxın məsafədə yerləşən bağçaya müraciət etməsi bildirilir.

Adının çəkilməsini istəməyən Sumqayıt sakini Xeberle.com-a müraciət edərək eyni hadisəni yaşadığını bildirib. Valideynin dediyinə görə, evinin yaxınlığında yerləşən bağçanın müdiri deyib ki, avqust ayında bağçanın qapısını təmir etmək şərtilə bizə ərizə ilə müraciət edə bilərsiniz, biz də sentyabr ayında uşağınızı bağçaya götürərik. Valideyn imkanı olmadığını qeyd etdikdə isə, "imkanın yoxdursa, uşağına özün bax” cavabı verilib. Bu tip onlarla misallar gətirmək olar. Bəs belə hadisə baş verən zaman valideyn nə etməlidir?!

Sumqayıt şəhər İcra Hakimiyyətindən (İH) məsələ ilə bağlı Xeberle.com-abildirildi ki, yuxarıda qeyd olunan hallarla üzləşən valideynlər İH-yə müraciət edə bilərlər.

Təhsil eksperti Nadir İsrafilov hesab edir ki, bu məsələ üzərində ciddi nəzarət olmalıdır: "Bu kimi hallar bizim təhsilimizə, cəmiyyətimizə, sosial siyasətimizə başucalığı gətirməsə də, çox təəssüflər olsun ki, qeyd olunan hadisələrin baş verməsi halları ilə razılaşmalıyıq. Bunun əsas səbəbi uşaq bağçalarındakı yer defisitlə bağlıdır. Azərbaycan müstəqillik əldə etdikdən sonra özəl sektora diqqət artırıldı. Bu sektorun inkişaf etdirilməsi məqsədilə o cümlədən məktəbəqədər təhsil müəssisələri, 300-ə qədər uşaq bağçası özəlləşdirilməyə çıxarıldı. Amma təəssüf ki, uşaq bağçaları özəlləşdirilməyə çıxarılan zaman təyinatı üzrə işləməli olsa da, Təhsil Nazirliyinin keçmiş rəhbəri tərəfindən bu məsələ üzərində ciddi nəzarət həyata keçirilmədi. Sözügedən 300-ə qədər bağçanın hardasa 100-dən artığının özəlləşdirilərkən təyinatı dəyişdirildi və onların hamısı ayrı-ayrı işbazlar tərəfindən sökülərək yerinə şadlıq sarayları, göydələnlər, gözəllik salonları kimi məişət obyektləri tikildi. Bu hal isə yer defisitini daha da kəskinləşdirdi. Uşaq bağçalarında olan bu vəziyyət nəzərəçarpacaq dərəcədə özünü göstərdikdən sonra, onlara diqqət artırıldı və bu sahədə təhlillər aparıldı. 2013-cü ildə ölkə başçısı tərəfindən təsdiq olunan "Təhsilin inkişafı üzrə Dövlət Strategiyası”nda həmin məsələ özünün konkret həllini tapdı. Digər tərəfdən strategiyada bu məsələ də irəli sürülüb ki, 2020-ci ilə qədər uşaqların 90 faizi icbari şəkildə məktəbəqədər təhsilə cəlb olunmalıdır. Şübhəsiz ki, məktəbəqədər hazırlığın da böyük hissəsi bağçalarda həyata keçirilməlidir, lakin 90 faiz uşaqların təhsilə cəlb olunması üçün bizdə kifayət qədər bağça yoxdur. Ona görə də sözügenən təhsil prosesinin həyata keçirilməsi məktəblərdə baş tutur, yəni bağçaların icra etməli olduqları funksiyaları məktəblər həyata keçirir. Buna görə də ölkə başçısı sərəncam verdi ki, tikilən göydələrin alt mərtəbələrində uşaq bağçaları yaradılsın. Hazırda bağçalarda olan yerlərin sayındakı çatışmazlıqlar qeyd olunan neqativ halların yaşanması ilə nəticələnir.. Amma mən hesab edirəm ki, bu məsələ üzərində ciddi nəzarət olmalıdır. Yerin olmaması ona əsas verməməlidir ki, hansısa bağça müdiri kimdənsə nəsə tələb etsin”.

Elnarə Salamova

Xeberle.com