Balıq tutmaq bu işi sevənlər üçün xəstəlik kimi bir şeydir. Həftə ərzində imkan tapan kimi balıq tutmağa gedən yüzlərlə insan var. Elə Sumqayıtın Dənizkənarı bulvarına üz tutan bu həvəskar balıqçılar kimi. Bura balıq tutanlara demək olar ki, günün istənilən vaxtı rast gəlmək mümkündür. Onlar vaxtlarını gözəl təbiət və dəniz qırağında keçirirlər.
Həvəskar balıqçı Araz İsayev 10 ildir ki, dənizə balıq tutmağa gəlir. Əsasən isti aylarda həftənin bütün günləri demək olar ki, dəniz sahilinə gələrək sevimli işi ilə məşğul olur və həm də istirahət edir. Arazın sözlərinə görə,balıq tutmaq üçün havanın necə olması əsas şərtlərdən biridir. Balıqçı ovun hər zaman filmlərdə göstərilən kimi uğurlu olmadığını, bəzən balıq tuta bildiklərini və evə əliboş döndüklərini deyir.
Şikar Kərimov da bu peşəyə aşiq olanlardandır. Balıq tutmağın ən az balıq yemək qədər faydalı olduğunu söyləyən müsahibimiz deyir ki, boş vaxtlarını balıq ovuna sərf etməklə yorğunluq və stressə son qoyur. Balıqçılar deyir ki, balıq qışa nisbətən yayda daha çox olur. Çünki soyuq aylarda balıqlar isti yerlərə və suyun dərinliyinə çəkilir. İndi hava küləkli olduğundan balıqçılar gəldikləri kimi geri dönürlər.
Həvəskar balıqçıların problemi də var. Söhbət dənizdə tor quranlardan gedir ki, bu da həvəskarların balıq tutmağında çətinliklər yaradır. Bu işlə məşğul olmaq səbir, dözüm və diqqət tələb edir. Məşhur bir el məsəlində deyildiyi kimi: "Könlü balıq istəyənin quyruğu suda gərək”.
Xəbərdən istifadə edərkən istinad etmək vacibdir.
