Xəbər verdiyimiz kimi bir aya yaxındır ki, respublika ərazisində
çimərlik ərazilərində aparılan monitorinqlər yekunlaşıb. Dəniz suyunun fiziki,
kimyəvi və toksikoloji göstəriciləri təhlil edilib. Bu monitorinqlər Xəzər dənizinin
Sumqayıt sahilində də aparılıb. Nəticələrə əsasən 27 il əvvəl verilən qərar bu
ildə qüvvədə olacaq. Bu barədə məlumat Gigiyena və Epidemologiya Mərkəzindən məlumat
verilib və bildirilib ki, hələ 1991-ci ilin aprel ayında verilmiş 91 saylı qərar
qüvvədədir, yəni Hacı Zeynalabdin qəsəbəsindən Corat qəsəbəsinə qədər olan məsafədə
yaşayan Sumqayıt şəhərinin sakinləri bu il də çimərliklərdən istifadə edə bilməyəcəklər.
Bəs çirkab suların təmizlənməsi məqsədilə istifadəyə verilən qurğular suyun təmizlənməsi
üçün kifayət etmirmi?
Məsələ ilə bağlı Xeberle.com-a açıqlama verən Sumqayıt Sukanal İdarəsinin rəis müavini Qurban
Mikayılov dəniz suyunun çox hissəsinin çirkab sularından təmizləndiyini və
qurğuların olmadığı ərazilər üçün xüsusi layihənin hazırlandığını bildirdi:
"Təmizləyici qurğu şəhərin 26-cı məhəlləsi, Xəzər bağları
adlanan ərazisində yerləşir. Qurğu təxminən 2005-ci ildən çalışmağa başlayıb.
Sutka ərzində 130 min kubmetr (bunun 90 min kubmetri sırf Sumqayıtın, 40 min
kubmetri isə digər qəsəbə və yaşayış massivlərinin payına düşür) sərfiyyat olur
ki, bu qurğu onun 120 min kubunu təmizləyir. Lakin Hacı Zeynalabdin qəsəbəsi
(Nasosnu), Köhnə Corat qəsəbəsi, Xəzər bağları, Yaşıldərə yaşayış massivi ərazilərindəki
yaşayış evləri mərkəzi kanalizasiya sisteminə qoşulmadığı üçün sutkada 10 min
kubmetr kanalizasiya suyu birbaşa dənizə axıdılır. Azərsu və Ekologiya
Nazirliyinin təşəbbüsü ilə yaşana biləcək problemlərlə bağlı monitorinqlər
keçirmişik. Bizə aid olan hissə, yəni Xəzər
bağları üçün layihə hazırlanır. Hacı Zeynalabdin qəsəbəsində Sovet hökuməti
dövründə su kanalları var idi və su 500, 800-lik boru ilə təmizləyici qurğuya
göndərilirdi. Hazırda qəsəbə üçün də layihə hazırlanır. Bulvar ərazisində isə dənizə
heç bir şəkildə çirkab suları axıdılmır”.
Sumqayıt Bulvar İdarəsindən isə bildirildi ki, ərazidə çimmək
üçün xüsusi bir yer ayrılıb:
"Bulvarda çimmək üçün xüsusi bir yer ayrılıb ki, insanların
istirahətinə maneçilik törədilməsin. Camaat buraya ailə, uşaq ilə gəlirlər. Həm
də suda xəstəlik var və çimmək olmaz”.
Elnarə Salamova
Xeberle.com
Xəbərdən istifadə edərkən istinad etmək vacibdir.
