"Sumqayıtın Corat qəsəbəsində yeni müasir tipli bağça tikilir. Yaxın zamanlarda isə Stansiya Sumqayıt adlanan yaşayış massivində də körpələr evinin inşası nəzərdə tutulur".
Bu sözləri Xeberle.com-a açıqlamasında Sumqayıt şəhər İcra Hakimiyyətinin sözçüsü Eyvaz Qocayev deyib. E.Qocayev bildirib ki, uşaq bağçalarında məskunlaşan məcburi köçkünlər də mənzillərlə təmin olunduqdan sonra əlavə qruplar da açılacaq: "Bunun sayəsində də Sumqayıtda uşaq bağçası problemi öz həllini tapmış olacaq".
Xatırladaq ki, Sumqayıt şəhərində məskunlaşmış məcburi köçkünlər üçün 12-ci mikrorayonda 936 mənzildən ibarət yaşayış binaları tikilir.
Məlumata görə, kompleksin tikintisi başa çatdıqdan sonra şəhərin uşaq bağçalarında 200-dən artıq qrup və 120 yardımçı otaq boşalacaqdır. Bu da 3000-dən çox uşağın bağçalara əlavə qəbul olunması və ya təqribən 15 yeni bağçanın tikintisi deməkdir.
Ümumiyyətlə, bağça problemi yalnız Sumqayıt şəhərində deyil, ölkənin digər regionlarında da mövcuddur. Təhsil üzrə ekspert Kamran Əsədov deyir ki, respublikada 1672 körpələr evi və uşaq bağçası fəaliyyət göstərir. Uşaq bağçalarında məktəbəqədər təhsildə sıxlıqlar yarandığı üçün 2 ildir ki, Azərbaycanda məktəblərin nəzdində məktəbəhazırlıq qrupları fəaliyyətə başlayıb: "Bu, şagirdlərin psixoloji və fiziki cəhətdən məktəbə hazırlığını həyata keçırmək üçün daha əlverişli üsul olduğu üçün ölkədə məktəb yaşında olan uşaqların bu pilləyə cəlb olunması əvvəlki illərə nisbətən ciddi şəkildə artıb. Bütün bunlar təhsilin inkşafına təkan verən amillər olsa da, müəyyən çatışmazlıqlar hələ də var. Əsas çatışmazlıq şagird sıxlığıdır. Əsasən də məktəbəqədər qruplarda dərs vəsaitlərinin kifayət qədər olmaması da çətinliklər yaradır".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
