Nəzir, ianə və bu kimi məsələlər dinin əsas dəyərlərindəndir. Hətta belə bir hədis də var ki, verilən nəzir insanı baş verə biləcək təhlükədən qoruyur. Bu, həmçinin insanlar arasında mübadilə rolunu oynayır. Nəzir qutularına yığılan pullar və onların sərfiyyatı çox zaman müəmma doğuran məsələ olub.

Qafqaz Müsəlmanları İdarəsinin Mətbuat katibi Rəhimə Dadaşova Xeberle.com-a açıqlamasında bildirib ki, bir çox məscidlərdə nəzir qutuları götürülüb, amma bəzi ibadət ocaqlarında hələ də qalmaqadadır. Yığılan pulun hara sərf olunmasına gəlincə isə, R.Dadaşova qeyd edib ki, nəzirlər məscidlərin kommunal xərclərinin ödənilməsinə sərf olunur: "Çünkü məscidlərin kommunal xərclərini dövlət müəyyən limit əsasında ödəyir. Xərclər də çox olduğundan məscid məcburdur ki, yığılan nəzirlər vasitəsiylə xərcləri qarşılasın. Məscidlərə edilən ianələr vasitəsi ilə isə şəhid ailələrinə və aztəminatlı ailələrə yardımlar edilir. Ehtiyacı olan, eləcə də çörək almağa pul tapmayan insanlar məscidlərə müraciət edə bilərlər. İbadət ocağının qapısı hər zaman onların üzünə açıqdır".

Sumqayıt Cümə Məscidinin axundu Hacı Rauf Sərdarov isə deyir ki, nəzir qutularına yığılan pullar kommunal xərclərlə yanaşı, digər məsələlərə də məsrəf olunur: "Burada yığılan vəsait yalnız kommunal xidmətlərə sərf olunmur. Məsciddə çalışan işçilərin əmək haqqı da yığılan nəzirlər hesabına ödənilir".

Qeyd edək ki, ötən ilin iyulunda prezident İlham Əliyevin sərəncamı ilə Prezidentin Ehtiyat Fondundan Qafqaz Müsəlmanları İdarəsinə 1 milyon manat ayrılıb. Həmçinin, "İslam Həmrəyliyi ili”nin davamı kimi 2018-ci ildə keçiriləcək əlavə tədbirlərin maddi təminatı üçün 2018-ci il dövlət büdcəsində nəzərdə tutulmuş Prezidentin Ehtiyat Fondundan Qafqaz Müsəlmanları İdarəsinə 4 milyon manat ayrılıb.

Ötən gün isə ölkə başçısının sərəncamıyla Azərbaycanda dini icmaların maddi-texniki təchizatının yaxşılaşdırılması məqsədi ilə 2018-ci il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Dini Qurumlarla İş üzrə Dövlət Komitəsinin tabeliyində olan Mənəvi Dəyərlərin Təbliği Fonduna 400 min manat ayrılıb.

Xeberle.com