Suda boğulan insanı xatırladan Sumqayıt səhiyyəsi
Sumqayıt səhiyyəsi son iki ildə bir sıra peşəkar həkimini itirib. Xeberle.com məlumat verir ki, onlar arasında rəhmətə gedən, yaşa görə və digər səbəblərdən işdən uzaqlaşdırılanlar var.
Ümumi marağı nəzərə alaraq, həmin həkimlərin adlarını təqdim edirik:
Vəliyətdin Gözəlov -
Sumqayıt şəhər 2 saylı şəhər Xəstəxanasının baş həkimi olub, rəhmətə gedib.
Cəfər Quliyev - Sumqayıt şəhər Təcili Tibbi Yardım Xəstəxanasında
cərrah vəzifəsində çalışıb, yaşa görə işdən çıxarılıb.
Rəfiəli Novruzov
- Sumqayıt şəhərinin ilk tibb
elmləri doktoru, Sumqayıt Səhiyyə Şöbəsinin baş cərrahı, Sumqayıt şəhər 4 nömrəli
Xəstəxananın cərrahiyyə şöbəsinin müdiri - işdən çıxarılıb.
Xalidə Quliyeva - Sumqayıt şəhər Səhiyyə şöbəsinin baş
pedaiatrı - yaşa görə işdən çıxarılıb.
Kamil İbadov -
Sumqayıt şəhər Səhiyyə şöbəsinin baş terapevti, "Əməkdar həkim" –
yaşa görə işdən çıxarılıb.
Zahid Quliyev -
Sumqayıt şəhər Təcili Tibbi Yardım Xəstəxanasının şöbə müdiri, cərrah -
rəhmətə gedib.
Eldar Məmmədov - Sumqayıt Onkoloji Dispanserin baş həkimi, səhiyyə
şöbəsinin baş onkoloqu - rəhmətə gedib.
Fərman Süleymanov -
Sumqayıt şəhəri 2 nömrəli Doğum Evinin həkim-anestezioloq-reanimatoloqu - işdən
çıxarılıb.
İmmi Ələkbərova - Sumqayıt 2 saylı Doğum Evinin baş həkimi -
işdən çıxarılıb.
Sevda İsgəndərova
- Sumqayıt şəhər 1 nömrəli Doğum evinin baş həkimi - işdən
çıxarılıb.
Xəlil Mirzəliyev - Sumqayıt şəhər 2 saylı Doğum Evinin anestezioloqu( 1 ay fəaliyyət göstərib) - öz ərizəsi ilə işdən azad olunub və ölkəni tərk edib.
Xanlar Rüstəmov - Sumqayıt Onkoloji Dispanserin anestezioloqu - öz ərizəsi ilə işdən azad olunub və ölkəni tərk edib.
Şahin Novruzov - Sumqayıt şəhər 4 nömrəli Xəstəxananın cərrahı
- işdən çıxarlıb, ölkəni tək edib.
Bəhram Paşayev - 3
saylı şəhər xəstəxanasının baş həkimi - vəzifəsindən uzaqlaşdırılıb, sıravi həkim
kimi çalışır.
Ariz Axundov - 3 saylı poliklinikanın baş həkimi - işdən
çıxarılıb.
Mətanət Salmanova - Sumqayıt şəhər 4 nömrəli Xəstəxananın
terapevti - işdən çıxarılıb.
Elman Əliyev -
Sumqayıt Təcili Tibbi Yardım Xəstəxanasının nevropotoloqu - işdən çıxarılıb.
Malik Rzayev - 2
saylı şəhər xəstəxanasında damar cərrahı -
işdən çıxarılıb.
Məhbubə Əlizadə -
Uzun müddət Səudiyyə Ərəbistanında çalışıb və Sumqayıtın ən güclü
anestezioloqlarından biri olub. 2 saylı Doğum Evininin anestezioloqu işləyib -
işdən çıxarılıb.
Mayılxan Tağıyev - Şəhərin
baş psixiatrı, Ruhi-Əsəb Xəstəlikləri Dispanserinnin baş həkimi - işdən çıxarılıb.
Mətanət İsmayılova -
1 saylı poliklinikanın baş həkimi - işdən çıxarılıb, ölkəni tərk edib.
Arif Yusifov –
Sumqayıt şəhər Təcili Tibbi Yardım Stansiyasının baş həkimi – işdən çıxarılıb.
Elşən Kələntərli - Sumqayıt şəhər 1 saylı xəstəxananın reanimasiya şöbəsinin rəisi - işdən çıxarılıb
Natiq Qubadov - Sumqayıt Rayonlararası Narkoloji Dispanserin həkimi- işdən çıxıb, ölkəni tərk edib
Cəmalə Qubadova - Sumqayıt şəhər 3 saylı uşaq poliklinikasının həkimi - ölkəni tərk edib.
Fidan Həsənzadə - Sumqayıt şəhər Təcili Tibbi Yardım Xəstəxanasında anestezioloq - işdən uzaqlaşdırılıb
Elşad Muradov - 3 saylı şəhər xəstəxanasının baş həkimi - cəmi 3 ay işləyib, sonra işdən çıxarılıb.
Çingiz Cəfərov - 2 saylı şəhər xəstəxanasının baş həkimi - cəmi 7 ay işləyib, sonradan işdən çıxarılıb
Asif Yaqubov - Sumqayıt Təcili Tibbi Yardım Xəstəxanasının neyrocərrahı - işdən çıxarılıb, ölkəni tərk edib.
Cəbrayıl Əlnağıyev - Sumqayıt Təcili Tibbi Yardım Xəstəxanasının treavmatologiya şöbəsinin müdiri, Səhiyyə şöbəsinin baş travmatoloqu, "Əməkdar həkim" - yaşa görə işdən çıxarılıb
Rauf Ağayev - Sumqayıt Təcili Tibbi Yardım Xəstəxanasının həkimi- işdən çıxarılıb, ölkəni tərk edib.
Bu siyahını təhlil etdikdə görmək olar ki, həkimlərin bir qismi ölkəni tərk etməyə
üstünlük veriblər. Digər bir məqam isə
anestezioloqlarla bağlıdır. İşdən azad olunanların böyük qismi bu sahənin həkimləridir.
Belə görünür ki, bu minvalla şəhərdə anestezioloq qalmayacaq.
Yuxarıda adları
sadalanlar ölkəni tərk etmiş, eləcə də digər səbəblərlə - öz istəkləri ilə və
ya təqaqüd yaşı ilə əlaqədar olaraq işdən uzaqlaşdırılmış həkimlərin az bir
hissəsidir.
Maraqlısı odur ki, təqaüd yaşı tamam olan həkimlərin əksəriyyəti
işdən çıxarılsa da, məsələn, 2 nömrəli Doğum Evinin 66 yaşlı ginekoloqu Emilya Hüseynova isə hələ
də iş başındadır. İş burasındadır ki,
sözügedən doğum evinin baş həkimi E.Hüseynovanın qızı Xədicə Binnətzadədir.
Anasının təqaüd yaşı olmasını, bəlkə də səhhətini və iş qabiliyyətini nəzərə
almayan baş həkim hansı ədalətdən və düzgünlük prinsiplərindən danışa bilər?!
Səhiyyə sistemi dövlət büdcəsindən maliyyələşsə də, niyəsə
bu gün dövlət xəstəxanalarında maddi-texniki baza, tibbi avadanlıq və materiallar,
cari təmir işləri hər bir müəssisənin kollektivinin, tibb personalının şəxsi büdcəsi hesabına təmin edilir.
Araşdırmalarımız göstərir ki, xəstəxanalarda sterilizasiya
avadanlıqları köhnə üsullarla işləyir, bütün dünyada olduğu kimi birdəfəlik
tibbi vasitələrdən deyil, kustar
üsullarla sterilizasiya verilərək çoxdəfəlik istifadə edilir.
Sumqayıt səhiyyəsində mərkəzi qazanxanalar olduğu halda xəstəxanalar
isti su üzünə həsrətdir. Əvəzində isə həkimlərin şəxsi büdcəsi ilə aldığı qızdırıcılar vasitəsilə isti su əldə
olunur.
Tibbi müəssisə rəhbərlərinin seçimlərində peşəkarlıq, təcrübə,
bacarıq və savad faktoru deyil, başqa faktorlar əsas götürülür.
Məsələn, ilk dəfə endoskopik cərrahiyə şöbəsini dövlət müəssisəsində yaratmış Sumqayıt şəhər
4 nömrəli Xəstəxananın cərrahiyyə şöbəsinin müdiri, şəhərin ilk tibb elmləri doktoru, professor Rəfiəli Novruzov Səhiyyə
şöbəsinin müdiri Nəriman Baxşəliyevin
göstərişi ilə işdən uzaqlaşdırılır.
Digər bir məqamı diqqətə çatdıraq. Hacı Zeynalabdin qəsəbəsində yerləşən 3 saylı
şəhər xəstəxanasının baş həkimi Bəhram Paşayev tutduğu vəzifədən
uzaqlaşdırılır. Onun əvəzinə isə rəhbərlik təcrübə baxımından əvvəlki baş həkimdən geri qalan İsa Məmmədova
tapşırılır.
Ölkə prezidenti İlham Əliyev
tərəfindən regionlarda tibb müəssisələrinin tikilməsinə, təmirinə və
müasir avadanlıqlarla təchizatına xüsusi önəm verilir. Elə Sumqayıt rəhbərliyi
səviyyəsində də şəhərdəki səhiyyə müəssələrinin yenidən qurulması, əsaslı təmir
olunması daim diqqətdə saxlanılır. Sumqayıt şəhər İcra Hakimiyyətinin başçısı Zakir
Fərəcov şəhərdə fəaliyyət göstərən bütün səhiyyə ocaqlarına şəxsən baş çəkir, aparılan infrastruktur dəyişiklikləri ilə birbaşa tanış olur. Son 3 ildə 2 nömrəli
Doğum Evi, 1, 2 , 3 və 4 nömrəli poliklinikalar, Stomatoloji və Uşaq
poliklinikaları, Onkoloji Xəstəxana, Uşaq Xəstəxanasının yoluxucu xəstəliklər
korpusu, və 1 saylı Qadın Məsləhətxanası əsaslı təmir olunub. Şəhər icra
hakimiyyətinin başçısı səhiyyə işçiləri ilə görüşdə mövcud çatışmazlıqların
aradan qaldırılması ilə bağlı müvafiq tapşırıq və tövsiyələrini verir. Amma
bütün bunlardan sui-istifadə edənlər də tapılır.
Xəstəyə baxım, qulluq, texniki təchizat, xəstəxananın
gündəlik və aylıq xərcləri, xəstə geyimləri, mələfələr, qeyri-steril
materiallar, məişət avadanlıqları, elektrik malları bir çox müəssiələrdə təmirdən
sonra sıradan çıxmış haldadır. Büdcədən bunlar üçün aylıq və ya illik pul
ayrılsa da, müəssisələrdə sıradan çıxmış inventarların yenilənməsi baş
vermir.
Dərman vasitələri və tibbi ləvazimatlar isə yox dərəcəsindədir. Bu gün müəssisələrdə
tibbi personal steril əlcəkləri belə öz vəsaitləri hesabına alırlar. Sistem məhlulları, işlədilən adi spirt belə
müəssiələrin əksəriyyətində tapılmır.
Başqa bir məqama diqqət yetirək. 2 saylı Doğum Evində süni tənəffüs aparatı yoxdur. Vaxtından əvvəl doğulan körpələr bu aparatın olmaması ucbatından 1 saylı Doğum Evinə göndərilir.
Bir sözlə, Sumqayıt səhiyyəsi boğulan"insana" bənzəyir. O "insan" isə saman çöpündən yapışıb…
Dəfələrlə Sumqayıt şəhər Səhiyyə şöbəsinin müdiri Nəriman Baxşəliyevdən bizi maraqlandıran suallara cavab tapmaq üçün müraciət etsək də, o hər dəfə müxtəlif bəhanələrlə suallardan yayınıb.
Sonuncu dəfə onunla əlaqə saxlanılan zaman açıqlama veкməkdən boyun qaçıraraq saytımıza "Siz kimsiniz ki, mənə zəng vurursunuz? Mən sizin heç bir sualınıza cavab verməyəcəm." -deyə bildirib.
Amma buna baxmayaraq yenə də qarşı tərəfin mövqeyini işıqlandırmağa hazırıq.
P.S. Yazıda Xəlil Mirzəliyev, Xanlar Rüstəmov iş yerləri düzgün qeyd olunmamış, çalışdığı yer Sumqayıt şəhər Təcili Tibbi Yardım Xəstəxanası kimi göstərilmişdir. Artıq yanlışlıq aradan qaldırılıb.
Xeberle.com
Xəbərdən istifadə edərkən istinad etmək vacibdir.
