Görəsən insanın öz canına qıyıb, intihar etməsinə başlıca səbəblər nədir, üstəlik də intihar üçün 14 mərtəbəli binanın seçilməsinin xüsusi səbəbləri varmı?

Xeberle. com-a son vaxtlarda artan intihar halları haqda danışan psixoloq, ailə terapevti Zeynəb Eyyubova bildirdi ki, əgər 14 mərtəbə adlanan bina Sumqayıt şəhərində bu sahədə məşhurluq qazanıbsa, deməli insanlarda şüuraltısına intihar üçün bir yer, məkan anlayışı kimi yeriyib: "Tək son olan hadisəni araşdırsaq, gecə saatlarında olan intihar hadisəsinə iki aspektdən yanaşmaq olar. Əgər binanın damlarına olan çıxışlar bağlanıbsa, tam şəkildə bağlanmalıdır, çünki intihara meyilli şəxsin bu cəhdlə gedərək istəyini həmin yerdə tapmasaydı,beynində fikirlər qarışanda bir az cəhdindən əl çəkmə ehtimalı olacaqdı. Bu məsələnin birinci tərəfi idi. İkinci tərəf isə - bir yer ki, artıq bu tip məşhurlaşıb, onda artıq mühafizənidə gücləndirmək lazımdır. Artıq bunu daha yaxşı səlahiyyətli orqanlar bilər, lakin mühafizə xidməti artıq həmin ərazidə mütləqdir".

Psixoloq deyir ki, gənclərin eyni məkandan intihar etmələri də, məxsusi idarələr tərəfindən maarifləndirici seminar və tədbirlərin keçirilməsini zəruriləşdirir. Baş verən intihar hadisələrini qarşısını tam almaq mümkün olmasa da minumuma endirmək olar: "Sözügedən bina da ciddi şəkildə mühafizə olunsa insanlar da rahat şəkildə gəlib intihar edə bilməyəcəklər. Düzdür, digər aspektdən yanaşsaq, intihara meyilli insan harda olsa öz istəyini gerçəkləşdirə bilər. Lakin bunu bütün psixoloqlar təsdiq edir ki, intihar hadisəsi həmin anda qərar verilib və həyata keçirilə bilən hadisədir, çünki həmin an insanda şüuraltıdan gələn bir problem var. Amma ola bilsin ki, kimsə getdi həmin 14 mərtəbəli binaya intihar fikrini həyata keçirməyə, lakin cəhdi boşa çıxsa 5 gün sonra müalicə də ala bilər, və yaxud da valideyni bilsəydi ki, onun problemi var və övladının yanında olardı, bunların hamısı intiharın qarşısını ala biləcək hallardır. Hər kəs birmənalı şəkildə əl - ələ verib bu problemin həllinə çalışsa bu problemi minimal həddə çatdırmaq olar. Ən azından intihar halına gəlməyən insanlabuna meyilli insanların psixologiyası eyni deyil. Bunun üçün də mütləq maarifləndirici tədbirlər görülməlidir".

Xədicə Səxavətqızı

Xeberle.com