Sumqayıtda
1958-ci ildən istifadəyə verilən 9 nömrəli orta ümumtəhsil məktəbinin binası
söküləcək və tədris müəssisəsi üçün yeni bina tikiləcək. Bununla bağlı müvafiq qurumlar tərəfindən işlər aparılır.
Məktəbin
direktor əvəzi Həqiqət Abdullayeva Xeberle.com-a bildirib ki, tədris müəssisəsinin
binası uzun illərdir ki, qəzalı vəziyyətdədir: "Pilləkənlərdən istifadə qeyri- mümkün
idi. Məktəb binası heç zaman əsaslı təmir olunmayıb. Söküntü işlərinə, bizim tədrisimizi
davam etdirə biləcəyimiz müvəqqəti məktəb binası seçildikdən sonra
başlanılacaq. Hazırda yerdəyişmə üçün hazırlıq işləri gedir. Söküntü işləri tədris
prosesinə mənfi təsir göstərməyəcək".
Sumqayıt şəhər
Təhsil Şöbəsinin aparıcı məsləhətçisi Oqtay Nuriyev isə Xeberle.com-a bildirib ki, məktəbin müvəqqəti olaraq fəaliyyət göstərəcəyi
bina da müəyyənləşib: ""İstək"
liseyinin binasına köçürüləcək və tədris prosesinə orada davam etdiriləcək.
Danışıqlar aparılır və yaxın zamanlarda köçürülmə işlərinə başlanılacaq".
Yeri gəlmişkən, bununla bağlı Prezident İlham Əliyevin sərəncamı
ilə Sumqayıt şəhərində 1176 şagird yerlik yeni
ümumtəhsil məktəbi binasının tikintisi məqsədilə Azərbaycan Respublikasının 2018-ci
il dövlət büdcəsində nəzərdə tutulmuş Prezidentin ehtiyat fondundan Təhsil
Nazirliyinə ilkin olaraq 1 milyon manat ayrılıb.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
