Artıq soyuq qış fəslini yaşayırıq. Qış özü ilə hələlik qar olmasa da, yağışlı günlər gətirir. Bu fəslin gəlişinə daha çox uşaqlar və uşaq ruhlu insanlar sevinir. Belə ki, qış uşaqlar üçün qar, Yeni il şənliyi, Şaxta baba, Qar qız, yolka və hədiyyələr deməkdir. Yeni il şənliyi daha çox teatr binalarında və şəhərimizin mədəniyyət ocaqlarında sevilən aktyorların ifasında keçirilir. Hər il bu kimi bayramlarda məşhur simalara rol verilir ki, uşaqların bayramları daha çox unudulmaz və yaddaqalan olsun.
Bayrama xüsusi hazırlaşan teatrlar və mədəniyyət ocaqları hazırda Yeni il üçün yeni layihələr üzərində işləyirlər. Xeberle.com olaraq mədəniyyət ocaqları ilə əlaqə saxlayıb, Yeni ilə hazırlıqlarının necə davam etdiyini soruşduq.
Sumqayıt şəhər Mədəniyyət və regional mərkəzin müdiri Mehman Şükürovdan aldığımız məlumata görə, mədəniyyət ocaqlarımızın əksəriyyəti bayramda yeni tamaşalar və uşaqların sevimli nağıllarının personajları ilə onlara unudulmaz anlar yaşatmağa hazırlaşırlar. Belə ki, dekabrın 26-dan etibarən "Sumqayıt” Teatr binasında, "Nərimanov” Mədəniyyət mərkəzində, "Kimyaçılar” Mədəniyyət Sarayında və Əlillər Cəmiyyətinin təşkilatçılığı ilə "Bakı” Şadlıq evində balacalar üçün Yeni il şənlikləri təşkil ediləcək. Qeyd edək ki, tədbirlər bayram günlərində də davam edəcək.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
