Qubalı pəhləvanlar Laçın və Hüseyn Abdulhüseynov qardaşlarını demək olar dünyanın əksər ölkələrində tanıyırlar. ABŞ-ın "America Got Talant" istedadlar yarışmasındakı çıxışlarından dünyada məşhur olan qardaşları tez-tez müxtəlif ölkələrə festivallara, tədbirlərə, yarışmalara dəvət edirlər, onların göstərdikləri nömrələr maraqla qarşılanır.
Adları "Dünya rekordlar kitabı"na düşən, aldıqları mükafatların çoxluğu səbəbindən az qala evlərində yer olmayan bu qardaşlar Azərbaycanın qədim el sənəti olan pəhləvanlığı yaşadır, dünyada təbliğ edirlər.
Qəribədir ki, bu gün onlar rəsmi olaraq heç bir yerdə işləmir, maaş almırlar.
Bunu açıqlamasında qardaşlardan biri - Laçın Abdulhüseynov deyib.
L. Abdulhüseynov qeyd edib ki, müxtəlif dövlət tədbirlərində, hərbi hissələrdə keçirilən tədbirlərdə təmənnasız olaraq iştirak edir, qədim el sənəti olan pəhləvanlığı yaşadırlar: "Biz pəhləvanlıq sənətini inkişaf etdirmək istəyirik. Mədəniyyəti təbliğ edirik, 15-ə yaxın ölkədə olmuşuq, Azərbaycandan ilk dəfə olaraq 9 qat rəsmi dünya rekordçusuyuq. İlk azərbaycanlı kimi "Ginnesin Rekordlar Kitabı"na rəsmi namizədik. Biz həm də mədəniyyətimizi təbliğ etdiyimizə görə, çox istəyərdik ki, Mədəniyyət İdarəsi bizi işə götürsün. Rəsmi işçi kimi fəaliyyət göstərmək istəyirik. Necə ki, muğama, aşıq sənətinə qiymət qoyulur, pəhləvanlıq da elə bir sənətdir. Biz də istəyirik ki, Mədəniyyət İdarəsində rəsmi işçi kimi adımız qeyd olunsun. Bütün dövlət tədbirlərində, hərbi hissələrdə keçirilən tədbirlərdə təmənnasız iştirak edirik. Rəsmi işçi olmağımız gələcək fəaliyyətimizə də rəsmiyyət baxımından dəstək olardı. Açığı, bizi heç maaş düşündürmür, söhbət rəsmi işçi olmaqdan gedir".
Laçın Abdulhüseynov bu məsələ ilə bağlı onların fəaliyyətinə diqqət göstərilməsinə ehtiyac olduğunu söyləyib: "Qubada "sim pəhləvanları", yəni kəndirbazlar var, onlardan bəzi aktiv olanlar rəsmi mədəniyyət işçisi kimi fəaliyyət göstərirlər. Bir müddət əvvəl mən bununla bağlı Mədəniyyət Nazirliyinin Quba rayonu üzrə nümayəndəsi Fuad Orucova müraciət etdim, mənə yox cavabı verilmədi, dedi ki, düzələn işdir, amma nəticəsi olmadı".
Laçın Abdulhüseynovun sözlərinə görə, pəhləvan qardaşların rəsmi heç bir yerdə işləmədiklərini eşidənlər təəccüb edirlər: "Deyirlər ki, siz bu qədər xidmət göstərirsiniz, Azərbaycanı dünyanın ən müxtəlif ölkələrində tanıdırsınız, xidmətlər göstərirsiniz, gərək özləri sizi çağırıb maraqlanalar..."
Yeri gəlmişkən, qubalı pəhləvan qardaşlara xarici ölkələrdən dəvətlər gəlməkdə davam edir: "İtaliyanın məşhur bir telekanalında böyük layihəyə qatıldıq. Gürcüstanın ən məşhur "Talant" şousunda finaladək yüksəldik. Onu da deyim ki, həmin şouda münsiflərdən biri də Gürcüstan Prezidentinin xanımı (o dövrdə-red) idi. Hətta bizi Azərbaycanın qladiatoru kimi təqdim etdi. Orada da böyük uğur qazandıq. Bundan sonra Rusiyadan dəvət gəldi - Yakuboviçin verilişinə qatıldıq. Həmin verilişdə qardaşım rəsmi olaraq ikiqat, mən isə birqat dünya rekordu qırdıq, adımız Rusiyanın "Rekordlar kitabı"na salındı. Daha sonra Kolumbiyaya dəvət aldıq. Orada 25 yaşı olan telekanalda böyük bir festivalda qonaq qismində iştirak etdik. Hər ölkədən qeyri-adi istedadı olan gəncləri çağırmışdılar, Azərbaycandan da bizi dəvət etmişdilər. Orda da çıxışımız geniş yayımlandı.
Rumınıya telekanalında təşkil olunan məşhur "Talant" şouya da dəvət almışıq. Həmin şouda birinci mərhələni keçmişik, hazırda orada iştirakçı kimi davam edirik. Bir neçə yeni dəvətimiz də var, ancaq onları açıqlamıram, zənnimcə, çox maraqla qarşılanacaq, odur ki, sirr qalsa, yaxşı olar.
2019-cu ildə "Ginnesin Rekordlar Kitabı"na adımızın yazılma ehtimalı böyükdür. Gözlənilən yeniliklərdən biri də odur ki, "Azərbaycan rekordçuları" qrupu yaratmaq istəyirik. Bu qrupla ölkədən kənarda təşkil olunan qeyri-adi istedad yarışlarında, güc yarışlarında, festivallarda iştirak edəcəyik.
"Ginnesin Rekordlar Kitabı"na adımız düşəndən sonra bizə səlahiyyət veriləcək və istəyirik Azərbaycanda da "Rekordlar kitabı" olsun. Hər ölkənin öz "Rekordlar kitabı" var, bizdə də olsa, yaxşı olar. Bütün bu işlərlə biz Azərbaycanımıza xidmət etməyə, onun adını yüksəklərə qaldırmağa çalışırıq. Odur ki, istəyərdik bizim xahişimiz nəzərə alınsın. Bununla əlaqədar Azərbaycan Prezidentinə, I vitse-prezident Mehriban xanım Əliyevaya, Mədəniyyət naziri Əbülfəs Qarayevə də məktub ünvanlayacağıq".
Qubalı qardaşların bu istəyi ilə bağlı Xaçmaz Regional Mədəniyyət və Turizm İdarəsinin rəisi Nazim Ağayevdən münasibət öyrənilib: "Özünüz də bilirsiniz ki, bu qardaşlar milli idman növü ilə məşğul olurlar. Onlar Gənclər və İdman Nazirliyinə müraciət etsəydilər, daha məqsədəuyğun olardı. Mədəniyyət sahəsi üzrə onların hansı təhsilləri var, nə kimi uğurları var, şəxsən bununla tanışlığım yoxdur. Məlumatım var ki, o vaxt Quba şöbəmiz - nümayəndəliyimiz onlarla məşğul olub. Gəlsinlər, mən də tanış olum. Ola bilər ki, hansısa pəhləvan əvvəldən işləyib, bu gün də fəaliyyətini davam etdirir. Bu, o demək deyil ki, bu qardaşlar hökmən Mədəniyyət İdarəsində işləməlidirlər. Ölkəmizi layiqincə təmsil edirlərsə, biz onlara niyə köməklik göstərməyək? Quba Rayon Gənclər və İdman İdarəsinə müraciət etsəydilər, mənə elə gəlir onlara "yox" deməzdilər. Mən regional idarənin rəisiyəm, əlaqə saxlasınlar, görək nə köməkliyimiz dəyə bilər".
(yeniavaz.com)
Xəbərdən istifadə edərkən istinad etmək vacibdir.
