Respublika ərazisində çimərlik ərazilərində aparılan monitorinqlər yekunlaşıb. Dəniz suyunun fiziki, kimyəvi və toksikoloji göstəriciləri təhlil edilib. Bu monitorinqlər Xəzər dənizinin Sumqayıt sahilində də aparılıb. Nəticələr isə heç də ürəkaçan deyil. 

Səbəbinə isə Sumqayıt Gigiyena və Epidomologiya Mərkəzinin direktoru Rafiq Abdullayev belə aydınlıq gətirib: "1991-ci ildən başlayaraq Sumqayıt çimərliklərindən istifadə qadağan olunub. Acıdərə kanalının birbaşa təmizlənmədən dənizə axıdılması tam 28 ildir ki, Hacı Zeynalabdin qəsəbəsindən başlayaraq, Corat qəsəbəsinə qədər olan çimərlik sahəsini istifadəyə yarasız hala salır. Dövlət səviyyəsində bununla bağlı hər zaman işlər aparılıb və hazırda da aparılır. Hələ heç bir nəticə əldə olunmayıb. Sumqayıt ərazisindən götürülən dəniz suyu nümunələri həm bakterioloji, həm də fiziki-kimyəvi müayinələrin nəticələri normativlərə cavab vermir. Nazirlər Kabinetinin 1991-ci ildən verdiyi 9 saylı qərar hələ də öz qüvvəsində qalır. Bununla bağlı aidiyyatı qurumlara hər il məktubla müraciətlər olunur ki, "Çimmək qadağandır" nişanları qoyulsun və ərazi diqqətdə saxlanılsın”.

Sumqayıtın baş infeksionisti Sehri Babayev Xeberle.com-a açıqlamasında bildirib ki, belə bir təhlükənin mövcudluğu kütləvi şəkildə mədə-bağırsaq xəstəliklərinə səbəb ola bilər: "Birinci növbədə yararsız dəniz suyu istər mədə- bağırsağa, istərsə də dəriyə zərərli fəsadlar törədə bilər. Dəri xəstəliklərinə yol açar, dəridə yaralar əmələ gətirə bilər. Bununla yanaşı bağırsaq çöplərinin normadan artıq olması mədə-bağırsaq xəstəliklərini- qusma, ishal əmələ gətirir. Bunlar da hamısı bakterial infeksiyanın kəskinləşməsi, intaksikasiyavə bədən temperaturunun artmasına gətirib çıxara bilən hallardandır. Qadağan olunmuş çimərliklərdən istifadə edilməsə daha yaxşıdır".

S. Babayev mənfi hallar yarandıqda bir sıra prosedurun həyata keçirilməsini də vacib sayır: "İlkin olaraq əgər özünüzdə halsızlıq, yüngül temperatur və ürəkbulanma hiss edirsinizsə, böyük adamdırsa mədəsini özü yumalıdır. Mədəyə gedən bakteriya və ya virus təmizlənməlidir. Üstündən bir sutka keçərsə, bakteriya artıq bağırsaqdadırsa o zaman pəhriz gözlənilməlidir, çoxlu maye qəbul edilməlidir. Ayran, limon damızdırılmış, qaynadılmış su mədə tam doldurulmamaq şərtiilə, hissə-hissə qəbul edilməlidir.Yağlı qidalardan, lifli meyvələrdən ( gavalı, yemiş, şaftalı və s.) uzaq olmaq lazımdır. Artıq ishal varsa aktivləşdirilmiş kömür, çobanyastığı, kəklikotu dəmləməsindən istifadə edə bilər. Bir -iki gün ərzində ev şəraitində vəziyyəti yaxşılaşdırıb ictimai həyata davam etmək olar. Daha kəskin hallarda isə xəstəxanaya müraciət edilməlidir".

Sumqayıt sakinləri arasında keçirdiyimiz sorğu da deyilənləri təsdiq edir.Şəhər sakinləri əsasən Novxanı ərazisində olan çimərliklərdən istifadə edirlər.

Hər halda heç kim istəməz kimi sərinlədiyi vaxtda hansısa bir xəstəlik tapsın.

Xədicə Səxavətqızı

Xeberle.com