Sumqayıtda qanunsuz küçə ticarətinin qarşısını almaq üçün tədbirlər həyata keçirilsə də, şəhərin 20 Yanvar, Nizami meydanı və Nəriman Nərimanov küçəsində tam olaraq küçə ticarətinin qarşısını almaq mümkün olmayıb.

Əvvəl elə də çox rast gəlinməyən küçə ticarətçiləri indi demək olar ki, şəhərin müxtəlif yerlərinə səpələnib. Üstəlik bu ticarətlə məşğul olanlar küçələri də zibilləyir, özlərindən sonra alver etdikləri ərazilərdə xoşagəlməz mənzərə yaradırlar. Elə bu günlərdə şəhərin Nəriman Nərimanov küçəsində olduğu kimi.  Bəs aidiyyatı qurumlar nə deyir?

Sumqayıt şəhər İcra Hakimiyyətinin İstehsal və xidmət sahəsi üzrə sektorunun müdiri Natiq Dadaşov Xeberle.com-a açıqlamasında bildirib ki, küçə ticarətinin qarşısını almaq üçün hər gün reydlər keçirilir: "Küçə ticarəti ilə məşğul olanlar haqqında İnzibati Xətalar Məcəlləsində cərimələr müəyyən olunub və həmin işlə məşğul olan insanlar hüquq-mühafizə orqanları əməkdaşları tərəfindən cərimə olunur. Bizim həmin şəxsləri cərimə etmək kimi səlahiyyətimiz yoxdur, lakin hüquq mühafizə orqanları əməkdaşlarının iştrakı ilə dəfələrlə küçə ticarətini yığışdırmışıq. Dəfələrlə xəbərdarlıqlar da olunmasına baxmayaraq, onlar yenə də öz işlərinə həmin ərazilərdə öz işlərinə davam edirər. İcra nümayəndələri və icra hakimiyyətinin işçiləri ilə birgə hər gün reydlər keçiririk. Yaxın günlərlə həmin küçələrdən ticarət tamamilə yığışdırılacaq.”

Qeyd edək ki, qanunsuz küçə ticarətinin cəriməsi də var.

Bu, İnzibati Xətalar Məcəlləsinin 454-cü maddəsində ("Qanunsuz küçə ticarəti" adlı maddəyə əsasən, qanunsuz küçə ticarəti, yəni müvafiq icra hakimiyyəti orqanları tərəfindən müəyyən edilməmiş yerlərdə malların satılmasına və ya işlərin (xidmətlərin) görülməsinə görə 80 manat cərimə tətbiq olunur) əksini tapıb.

Xədicə Səxavətqızı

Xeberle.com