Hər gün sürət qatarı ilə Bakı istiqamətinə və əksinə istifadə edən Sumqayıt sakini Kənan Muxtarov bildirir ki, qatar var, lakin qatara aparan marşrut avtobusu yoxdur.”Sumqayıtda yaşasam da, hər gün Bakıya işə gedirəm. Qış aylarında qatardan istifadə etmək daha sərfəli olur, lakin yaşadığım ünvandan vağzala gəlmək mənim üçün vaxt itkisidir və çətinliklər olur. Mənim kimi hər gün paytaxta işləməyə və ya oxumağa gedənlər az deyil və hamı eyni promlemdən gileylənir. Yaxşı olardı ki, avtobus xətlərinin sayı artırılsın”.

Paytaxtda yerləşən ali məktəblərdən birində təhsil alan sumqayıtlı Yeganə Şahlarova isə dəmiryol vağzalına gedən istiqamətdə piyada yolunun – səkinin də olmamasından narazıdır. "Yeni tədris ilinin açılmasına sayılı günlər qaldı, hər gün Sumqayıtdan Bakıya getməyə məcburam, çünki təhsil aldığım ali məktəb paytaxtda yerləşir. Üstəlik də universitet metronun 28 may stansiyasında yerləşdiyi üçün qatarla gedib-qayıtmaq mənim üçün daha sərfəlidir. Əfsuslar olsun ki, vağzala getməyə marşrut tapmıram, başqa avtobuslarla gedib, vağzaldan uzaq məsafədə yerləşən dayanacaqda düşüb, hər gün  xeyli piyada yol gedəsi oluram, bu da azı 10-12 dəqiqə əlavə vaxtımı alır. Bununla da razılaşıram, lakin vağzala piyada gedərkən günün qaranlıq saatlarında həyatım təhlükədə olur, çünki maşın yolu ilə gedirəm, çox gülməli bir vəziyyətdir ki, ərazidə piyadalar üçün səki də yoxdur. ”

 

Nəqliyyat üzrə ekspert Ərşad Hüseynov dəmiryol vağzallarının şəhərin mərkəzi hissələrindən hesab olunduğunu söyləyir: "Dünyanın hər yerində, müasir, böyük şəhərlərdə, hətta deyərdim, orta həcmli şəhərlərdə də dəmir yol vağzalları nəqliyyat qovşağı hesab olunur. Çünki həmin ərazilərdə həm şəhərətrafı, həmdə ki, yaxın yaşayış məntəqələrinə gedişi rahatlaşdıran qatarlar keçir. Dünyanın hər yerində şəhərsalma layihələrində  elə planlaşdırılır ki, dəmiryol vağzallarının nəqliyyat qovşağı olması nəzərə çarpsın və buna uyğun olaraq da infrastruktur təşkil olunur. İnfrastrukturun daxilində dəmiryol vağzallarını şəhəriçi digər nəqliyyat vasitələri ilə birləşdirən, qovuşduran elementlər də durur. Azərbaycanda hazırda çox təəssüf ki, tramvay, trolleybus yoxdur, Sumqayıtda isə heç metro da mövcud deyil. Bir tək marşrut avtobusları var. Ona görə də maksimum dərəcədə əhalinin vağzaldan istifadəsi rahat olsun deyə avtobusların sayına, hərəkət xətlərinə və intervalına diqqət edilməlidir. Əks halda şəhərin müxtəlif istiqamətlərindən dəmir yol vağzalına hərəkət çətinləşir, sərnişin daşıma səmərəliliyini itirir. Marşrut xətləri intensiv hərəkət cədvəli ilə işləsə, dəmiryol vağzalının da işi asanlaşar, istifadəçilərin rahatlığı təmin olunar, həmçinin sərnişin axını da düzgün paylanar və düzgün idarə olunar. 2 marşrut xətti ölkənin 3-cü böyük şəhəri sayılan Sumqayıt əhalisi üçün təbii ki, azdır. Marşrut sxemi dəyişdirilməli, şəhərin müxtəlif istiqamətlərini dəmiryol vağzalı ilə birləşdirən, əlaqələndirən marşrut xətləri yaradılmalı, yaxud mövcud marşrutlarda dəyişikliklər olmalıdır. Dəmiryol vağzalı şəhərin zəruri istiqamətləri ilə əlaqəsi üçün şərait yaradılmalıdır. Yaxşı olardı ki, dəmiryol vağzalının yanında çox sayda marşrut qəbul edə biləcək nəqliyyat mübadilə mərkəzləri yaradılsın, iritutumlu avtobusların yan ala bilməsi və sərnişinlərin rahat gözləyə bilməsi üçün şərait yaradılsın. Sumqayıtda da, Bakıda da ictimai nəqliyyat çeşidi çox azdır, heç olmasa olanlardan da rahat istifadəni təmin etmək lazımdır".

 

Məsələ ilə əlaqədar Sumqayıt Avtomobil Nəqliyyatı ilə Sərnişindaşıma İdarəsinin rəisi Tofiq Saydumovla əlaqə saxladıq. Qurum rəsmisi vağzaldan 2 marşrut xətti üzrə 200 avtobusun gün ərzində müəyyən intervalla hərəkət etdiyini bildirdi. O, həmçinin qeyd etdi ki, gələcək planlarında şəhər üzrə marşrut xətlərini azaltmaq var, nəinki, yenilərini açmaq. "Dəmiryol vağzalına gəldikdə isə 1 və 10 saylı marşrut avtobus xətləri ərazidən keçir. Onların da hərəkət zolağı demək olar ki, bütün şəhəri əhatə edir. Yalnız şəhərin ikinci girişi sayılan Saray qəsəbəsi və Daş bazarı adalanan ərazilərdən vağzala birbaşa gələn marşrut xətti yoxdur, onu da azacıq piyada yol qət edərək ünvana çatmaq mümkündür. Bizim əhali hər şeyin rahatına öyrəşib. Vağzaldan azca aralıda dayanacaq var ki, həmin ərazidən bütün şəhəri əhatə edən marşrutlar keçir. Çox az məsafədə yolu piyada qət etməklə rahat vağzala çatmaq olar, həm də bədənləri açılar”, - deyə nəqliyyat rəsmisi bildirib

Ümid edirik ki, yoluna qoyulan digər problemlər kimi dəmiryol vağzalına aparan marşrut avtobusu problemi də öz həllini tapacaq. Dəmiryol vağzalını şəhərin müxtəlif istiqamətləri ilə birləşdirən avtobus marşrut xətlərinin sayı artırılacaq, bəzi avtobusların hərəkət istiqamətində dəyişikliklər ediləcək və hərəkət intervalları sərnişinlərə uyğun təyin olunacaq. Bir də Yeganə Şahlarova demişkən, 21-ci əsrdə gec də olsa, küçə boyunca piyadalar üçün səki zolağı düzəldiləcək.

P.S. Bu yazıdan sonra arabir ağlıma gələn Sumqayıt-Bakı yolu istiqaməti üçün Metrobus xəyallarım da dumanlandı