Elə bu günlərdə Sumqayıta səfər edən Azərbaycan Respublikasının Prezidenti İlham Əliyev ilə şəhər ictimaiyyətinin görüşündə icra başçısı Zakir Fərəcov da mövcud problemi ölkə rəhbərinin diqqətinə çatdırmışdı.

Həmin görüşdə Z. Fərəcov Sumqayıt məktəblərində şagird sıxlığı olduğundan yeni məktəbin və 8 məktəbdə əlavə tədris korpusunun tikintisinə ehtiyac olduğunu bildirdmişdi

Sumqayıt şəhər Təhsil şöbəsindən isə Xeberle.com-a verilən məlumatda bildirilir ki, sıxlıq əsasən ibtidai siniflərdədir. Belə ki, 20,maksimum 30 şagird üçün nəzərdə tutulan siniflərdə 35-40 şagird təhsil alır: "İki növbəli sistem olsa da sıxlığın qarşısını tam almaq mümkün deyil. Bu səbəbdən də əlavə korpusların tikintisinə ehtiyac var”.

Təhsil eksperti Kamran Əsədov isə hesab edir ki, məktəblərdə sıxlığı yaradan əsasən valideynlərdir. Ekspert əlavə tədris korpuslarının tikilməsinin problemi tam həll etməyəcəyini deyir: "Çünki məktəblərə qəbul zamanı məktəbə yaxın ərazidə yaşayıb, lakin həmin ərazidə qeydiyyatda olmayanlar üstünlük təşkil edir. Bu məsələnin birinci tərəfidir. Bu səbəbdən də sosial sorğu və proqnozlar düzgün olmur və nəticədə şagird sıxlığı yaranır. İkincisi isə, məktəblərdə sıxlıq əsasən rus bölmələrində yaranır. Son illərdə rus bölmələrinə meyl artıb, amma bunun müqabilində həmin siniflər üzrə müəllimlərin sayında artım yoxdur. Bu da öz növbəsində yenə də şagird sıxlığı yaradan amillərdən olur. Təbii ki, əlavə korpuslar tikilməklə şagird sıxlığının qarşısını müəyyən qədər almaq olacaq, lakin problem köklü şəkildə həllini tapmayacaq”.

K. Əsədov çıxış yolunu məktəblərdə iki növbəli təhsil sisteminə keçiddə görür: "Siniflərdə şagird sayının çox olması birbaşa təhsilə və təlimə təsir göstərən amildir. Əgər bir sinifdə 30 dan çox şagird varsa burada keyfiyyətdən danışmaq olmaz. İbtidai siniflər günün ikinci yarısında, yuxarı siniflər isə səhər növbəsində təhsil alsalar, bu həm şagirdlərin təhlükəsizliyinə, həmçinin də rahat təhsil almalarına şərait yaradar. Hazırdaiki növbəli olan məktəblərdə bu sistem proqnozlaşdırmaya əsasən həyata keçirilmir. Bəzi məktəb direktorlarının öz maddi maraqları əsas götürülür. Korpus tikilməsi bu mövcud problemi tam şəkildə həll etməyəcək. Məsələni düzgün şəkildə ikinövbəli sistem yaratmaqla da aradan qaldırmaq olar”.

Xədicə Səxavətqızı

Xeberle.com