Xeberle.com-un araşdırmasına görə, H.Hüseynovanın adı Sumqayıt seçicisinə elə də yad isim deyil, belə ki, deputat seçilmək istəyi onun çoxdan olan arzusudur. H.Hüseynova hələ 2005-ci ilin parlament seçkilərindən 42 saylı Sumqayıt II seçki dairəsindən deputatlığa namizəd olmuşdu. Həmin seçkilərdə o, əsas rəqibi olan xalq artisti Flora Kərimovaya uduzmuşdu; belə ki, DSK-nın sədri Tofiq Abdullayevin imzası və möhürü ilə qeyd olunmuşdu ki, Kərimova Flora Ələkbər qızı 5350 səslə deputat seçilib. Buna baxmayaraq, MSK nəticələri ləğv edərək F.Kərimovanın deputatlığını qəbul etməmişdi. Nəticədə Azərbaycan Respublikasının Baş Prokurorluğu səsvermə nəticələri Mərkəzi Seçki Komissiyası tərəfindən etibarsız hesab edilmiş 42 saylı Sumqayıt ikinci seçki dairəsində seçki qanunvericiliyinin kobud pozulması faktları ilə əlaqədar Azərbaycan Respublikası Cinayət Məcəlləsinin 308.1-ci (vəzifə səlahiyyətlərindən sui-istifadə) və 161.1-ci (seçki sənədlərini saxtalaşdırma, bilə-bilə səsləri düzgün hesablamama, yaxud səsvermənin gizliliyini pozma) maddələri ilə cinayət işləri başlamışdı.

Prokurorluğun ağır cinayətlərə dair işlər üzrə istintaq idarəsi tərəfindən aparılan istintaq zamanı məlum olub ki, 42 saylı dairənin sədri Tofiq Abdullayev, 17 saylı məntəqənin sədri Şükür Əzimov seçkilər zamanı səlahiyyət həddini aşaraq, insanların seçmək və seçilmək hüququna müdaxilə edib, rəsmi seçki sənədlərini saxtalaşdırıblar. Bu əmələ görə adıçəkilən şəxslər istintaq orqanı tərəfindən şübhəli şəxs qismində həbs edilmişdi.

F.Kərimova  hüquqlarının pozulması iddiası ilə Avropa İnsan Haqları Məhkəməsinə şikayət ünvanlamışdı.  Xalq artisti Flora Kərimovanın iddiası təmin edilmiş və  Azərbaycan hökuməti zərərçəkənə 59 min 100 avro cərimə ödəmişdi.

H. Hüseynovaya gəldikdə isə o, seçkidən 3 ay sonra Azərbaycan Respublikası Prezidentinin 7 fevral 2006-ci il tarixli Sərəncamı ilə  Ailə, Qadın və Uşaq Problemləri üzrə Dövlət Komitəsinin sədri vəzifəsinə təyin edilmişdir.

Yeri gəlmişkən qeyd edək ki, o, Sumqayıt Şəhər Partiya Komitəsinin birinci katibi vəzifəsində çalışmış, Azərbaycanın görkəmli ictimai-siyasi və dövlət xadimi, "Şöhrət" ordeni laureatı Kamran Hüseynovun qızıdır.

İndi isə görünən odur ki, o yenidən deputat olmaq arzusuna düşüb. 

Görəsən, xanım Hüseynova bu arzusuna çata biləcəkmi?  Bu isə qısa zaman ərzində məlum olacaq.