Sumqayıt Dövlət Yol Polisi Şöbəsinin əməkdaşları xüsusi karantin rejiminin gücləndirilməsi ilə əlaqədar olaraq şəhər ərazisində avtomobillərin hərəkətinin məhdudlaşdırılması ilə bağlı tədbirləri davam etdirir.
Xeberle.com-un əməkdaşının apardığı müşahidələrə əsasən yol polisi şöbəsinin əməkdaşları avtomobilləri saxlayaraq onları qeydiyyata alır və yollara çıxmamaları ilə bağlı xəbərdarlıq edir.
Növbəti dəfə həmin avtomobillərə rast gəlinəcəyi təqdirdə müvafiq tədbirlərin görüləcəyi sürücülərin nəzərinə çatdırılır.
Belə tədbirlər nəticəsində şəhərin mərkəzində avtomobillərin azalması müşahidə olunur.
Xatırladaq ki, martın 29-dan xüsusi karantin rejimi gücləndirilib. Bununla bağlı xüsusi təyinatlı, o cümlədən təcili tibbi yardım, qəza-bərpa, xilasedici, habelə yük daşıyan avtomobillərin hərəkəti istisna olmaqla, Bakı şəhəri, Sumqayıt şəhəri və Abşeron rayonuna giriş və çıxış məhdudlaşdırılıb.
Xəbərdən istifadə edərkən istinad etmək vacibdir.
