Yol genişləndirilir, köhnə asfalt sökülür.
Xəbər verdiyimiz kimi, Sumqayıt şəhəri ilə Abşeron rayonunu birləşdirən Saray körpüsü ətrafında genişləndirmə işlərinə başlanılıb. Məlum məsələdir ki, yeni infrastruktur layihəsinin icrasında məqsəd nəqliyyatın hərəkətini asanlaşdırmaq və əhalinin rahatlığını təmin etməkdir. Körpü ətrafında yolun genişləndirilməsi və infrastrukturun körpüyə uyğunlaşdırılması istiqamətində fəal iş gedir. Əraziyə müxtəlif təyinatlı ağır texnikalar cəlb olunub. Yolun bəzi hissələrində köhnə asfalt örtüyü sökülüb, qazıntı işləri aparılır. Bu işlər çərçivəsində yol kənarlarında istinad divarlarının möhkəmləndirilməsi, yağış sularının axıdılması üçün drenaj sistemlərinin qurulması da nəzərdə tutulub.
Tikinti işlərinin mərhələli şəkildə həyata keçirilməsi nəzərdə tutulub. Layihənin icrası nəticəsində həmin istiqamətdə nəqliyyatın hərəkət intensivliyi azalacaq, eyni zamanda vətəndaşların gündəlik gediş-gəlişi daha təhlükəsiz və rahat olacaq. Xeberle.com-un əməkdaşı sözügedən ərazidə olub və tikinti işləri ilə tanış olub. Əməkdaşımızla fikirlərini bölüşən sakinlər və sürücülər bildirib ki, yolun genişləndirilməsi çox müsbət addımdır.
Qeyd edək ki, Sumqayıtı Abşeronla birləşdirən Məhəmməd Əsədov küçəsində - dəmiryol xətti və Samur–Abşeron kanalı üzərində yerləşən yeni körpünün inşasına ötən lin dekabr ayında başlanılmışdı və tikinti işləri martda yekunlaşdırılıb. 3 aşırımdan ibarət olan körpü, 4 hərəkət zolağından ibarətdir. Körpü 104 metr uzunluğunda və 21,6 metr enində inşa olunub. Həmçinin, körpünün sağ və sol hissələrində piyada səkiləri də tikilib.
Körpü 4 dayaq üzərində inşa edilib və orta dayaqlarda 1,5 metr diametrli 6 sütun yerləşir. Ümumilikdə körpü 12 sütundan ibarət olub, hər dayaq iki cərgəli svaylar üzərində qurulub. Svayların uzunluğu 14 metr, diametri isə 1 metrdir və ümumilikdə 80 svaydan istifadə olunub.
Hazırda sıxlıq var, amma bu müvəqqətidir
Aparılan işlər səbəbilə Saray körpüsünə giriş və çıxış yollarında avtomobil sıxlığı müşahidə olunur. Xüsusilə səhər və axşam pik saatlarda bu əraziyə daxil olan sürücülər tıxac səbəbilə çətinliklə üzləşirlər. Lakin bu müvəqqəti xarakter daşıyır. Yolun genişləndirilməsi və infrastrukturun yenilənməsi işləri tamamlandıqdan sonra ərazidə nəqliyyatın hərəkəti xeyli rahatlaşacaq. Bu isə həm sürücülərin, həm də ictimai nəqliyyatdan istifadə edən sərnişinlərin işini asanlaşdıracaq.
Yol inkişafına kölgə salmaq cəhdləri nəticəsiz qalır
Amma nə yazıq ki, atılan hər müsbət addımda yalnış axtarmağa çalışan, görülən işlərə mənfi kölgə salmaq istəyənlər də az deyil. Xüsusilə qeyd etməliyik ki, Azərbaycan Avtomobil Yolları Dövlət Agentliyinin sədri Saleh Məmmədov quruma rəhbərlik etdiyi dövrdən bu günə kimi ölkənin sosial-iqtisadi inkişafını şərtləndirən mühüm amillərdən sayılan avtomobil yolları təsərrüfatında köklü dəyişikliklər baş verib. Yol infrastrukturu üzrə mühüm layihələr həyata keçirilib, yeni yollar, körpülər salınıb. Bir sözlə, Azərbaycanda yol infrastrukturunun inkişafı dövlətin əsas prioritetlərindən birinə çevrilib.
Azərbaycan Prezidentinin sərəncam və göstərişlərinə əsasən indi əsas diqqət regionlarda kənd və qəsəbələri birləşdirən yolların, həmçinin yaşayış məntəqələrinin daxili yollarının təmirinə və yenidən qurulmasına yönəldilib.
Hazırda ölkəmizdə yeni yolların salınması, mövcud yolların əsaslı şəkildə yenidən qurulması ilə bağlı layihələr durmadan uğurla davam etdirilir. Təbii ki, görülən işlərin əsas məqsədi nəqliyyat sistemində sıxlıq və tıxacların aradan qaldırılması, vətəndaşların avtomobil yollarını rahat və təhlükəsiz şəkildə keçməsinin təmin edilməsi baxımından xüsusi əhəmiyyətə malikdir.
Elşən YƏHYAYEV,
Xeberle.com
Xəbərdən istifadə edərkən istinad etmək vacibdir.
