Bütün dünyanı bürüyən koronavirus təhlükəsi, pandemiya səbəbindən ən çox zərər çəkən sahələrdən biri də turizmdir, xüsusilə də, beynəlxalq, ölkələrarası turizm. Təbii ki, virus təhlükəsi keçdikdən sonra da bir müddət insanlar xarici ölkələrə səyahət etməkdən çəkinəcək və proqnoz edilir ki, bununla əlaqəli olaraq daha çox turizm sahəsində böyük geriliklər baş verəcək. Çünki yoluxmaq təhlükəsini göz önünə alan insanlar əsasən yaxşı bələd olduğu, öz yaşadığı ərazidə - yaxın məkanlarda, rayon və şəhərlərdə dincəlməyə üstünlük verəcəklər. Sumqayıt şəhərində və ətraf qəsəbələrdə, bildiyimiz kimi, yay ayları üçün əsas istirahət yeri dəniz, çimərlikdir.  Amma heç şübhəsiz, şəhərimizin piknik və kamp perespektivləri də var. Sakinlər həftəsonları daha maraqlı istirahət edə bilərlər. Bütün günü parkların xüsusi ayrılmış hissələrində, yaxud da gecəni səhərədək çadırlar qurmaqla dəniz kənarında daha səmərəli vaxt keçirib dincəlmək olar, necə ki, bütün dünyada belə bir istirahət növü mövcuddur. 

Yeri gəlmişkən, bir vaxtlar paytaxt Bakıda pikniklər üçün bir neçə xüsusi yer var imiş; dəniz sahilləri ilə yanaşı, insanlar aeroporta gedən yollarda, zeytun sovxozlarının ərazilərində özləri üçün süfrələr aça bilirdilər. Ancaq nizamsız məskunlaşma ucbatından həmin yerlər sıradan çıxıb. Sumqayıt şəhər bulvar ərazisində də əvvəllər çadırlar qurub dincələ bilmək üçün müəyyən ərazilər var idi.  İndi isə Sumqayıt  ərazisində şəhərdən uzaqlaşmadan həftəsonunu təbiət qoynunda keçirə bilmək üçün belə şərait demək olar ki, yoxdur.

"Hal-hazırda  Sumqayıt şəhərindəki mövcud park və bulvar ərazisində "piknik” keçirilməsi məqbul sayılmır”. Bunu Xeberle.com-a Sumqayıt şəhər İcra Hakimiyyətinin mətbuat katibi Eyvaz  Qocayev deyib. Onun sözlərinə görə,  gələcəkdə bu sahədə şəraitin yardılması üçün uyğun məkanlar olarsa, məsələyə baxıla bilər. Eyvaz Qocayev həmçinin bildirib ki, Sumqayıt şəhərində insanların asudə vaxtlarını səmərəli keçirmək üçün hər cür şərait mövcuddur. Sumqayıt şəhərində son illərdə reallaşdırılan sosial-iqtisadi layihələrin bir istiqaməti də məhz yeni istirahət guşələrinin, parkların və bulvarın yaradılmasıdır. "Sumqayıt şəhəri yaşıllığına, istirahət məkanlarına görə seçilən şəhərlərdəndir. Son illərdə də bu istiqamətdə çox mühüm layihələr reallaşdırılıb.  Bildiyiniz kimi, 2016-cı ildə sumqayıtlıların çoxdankı arzusu reallaşdırıldı. Qısa müddət ərzində, Sumqayıtın dənizkənarı ərazisində 106 hektar ərazidə yeni bulvar salındı.  2019-cu ildə ildə isə bulvar ərazisi şimal-qərb istiqamətində 1 kilometr uzunluğunda, 400 metr enində, ümumilikdə isə 40 hektar sahədə genişləndirildi. Bulvar ərazisində insanların istirahəti üçün hər cür şərait mövcuddur, burada eyni zamanda müvafiq besetkalar da quraşdırılmışdır ki, bunlar da məhz şəhər sakinlərinin istirahəti üçündur. Bu layihənin həyata keçirilməsi bir daha onu göstərdi ki, Azərbaycan dövləti vətəndaşların asudə vaxtlarını səmərəli keçirmək üçün bütün zəruri tədbirəri görür. Bu işlər Sumqayıt şəhərində də uğurla həyata keçirilir və gələcəkdə də davam etdiriləcək”, - deyə Sumqayıt ŞİH-in rəsmisi qeyd edib.

Turizm mütəxəssisi Əjdər Məmmədov hesab edir ki, Sumqayıt şəhərində piknik zonaları yaradılan zaman ilk addımı dəniz sahilindən başlamaq daha məqsədəuyğun olar. Mütəxəssis həmçinin qeyd edir ki, piknik turizminin əsas məqsədi gətirdiklərini bişirib, yeyib qayıtmaqdan ibarət olmamalıdır: "Əgər bunun üçün xüsusi sahə ayrılırsa, həmin ərazidə gələn insanların istirahətlərini mənalı və yaddaqalan keçirə bilməsi üçün hər şərait qurulmalıdır. Restoran,əyləncə mərkəzləri, otel, balıq tutmaq üçün kiçik göl olmalıdır. Bundan əlavə, şəhərin mərkəzində olduğu kimi restoranlardan hazır qidalar deyil, öz gətirdikləri məhsulları hazırlaya bilmələri üçün insanlara şərait qurulmalıdır. Özləri özlərinə xidmət göstərməlidirlər. Ərazi olaraq isə, Novxanı, Goradil, Sumqayıt bulvarı, Hacı Zeynalabdin Tağıyev qəsəbəsinin sahil zolağından bu məqsədlə istifadə etmək olar. Balıqçılığa marağı olan insanlar öz tutduqları balığı bişirərək, daha maraqlı vaxt keçirmiş olarlar. Bundan əlavə, elektriklə işləyən maşınlarla əraziyə qısa turlar təkil oluna bilər. Bakı ilə Sumqayıt arasında dənizdə liman bərpa olunarsa, gəmi ilə qısa səyahətlər də sakinlərin marağına səbəb olar. Ödənişsiz olaraq uşaqlar üçün qum üzərində kiçik meydançalar, digər əyləncə vasitələri istirahətlərini daha yadda qalan edə bilər. Sumqayıt şəhəri park sayına görə də tanınmış şəhərlər sırasındadır. Hesab edirəm ki, parklarda belə şəraitin qurulması üçün xüsusi yenidən qurma işlərinə ehtiyac olmaz. Belə istirahət zonaları üçün əsasən geniş ərazilər seçilməlidir. Başlanğıc olaraq  dəniz kənarında belə mərkəzlər yaradılsa, daha yaxşı olar”, - deyə Ə.Məmmədov söyləyib.

Mövzu barədə şəhərin bir neçə fəal gənci arasında da sorğu keçirib, onların fikirlərini öyrəndik. 

Toğrul Məmmədov, satış mütəxəssisi: "Bütün sivil ölkələrin "gənclər şəhəri” deyilən ərazilərində, məsələn Türkiyənin İzmir, Amerikanın Nyu-York, Almaniyanın Köln şəhərində belə yerlər var. Ümumiyyətlə böyük şəhərlərin çoxunda gənc ailələrin, gənclərin istirahəti üçün belə zonalar var. Çox təəssüf ki, bu gün Sumqayıt gənclər şəhəri olsa da, gənclər, təşəbbüslər, belə təkliflər daha azdır. Gənclər şəhəri Sumqayıtda gənclərin irəli sürdüyü hər bir maraqlı, faydalı fikir reallaşarsa, şəhər öz adını sübut etmiş olar.”

Leyla Bədəlova, Sumqayıt ASAN Vəkil Bürosunun direktoru, vəkil: " Şəhər əhalisinin yaşadığı ərazidən uzaqlaşmadan səmərəli həftəsonu keçirə bilməsi üçün belə zonaların yaradılması, əlbəttə ki, daha məqsədəuyğun olardı. Həmçinin də belə ərazilərdə yaradılacaq oyun meydançaları, attraksionlar ödənişsiz olarsa, düşünürəm ki, əhalinin bütün təbəqələrdən olan nümayəndələri üçün düşünülmüş addım olar. ”

Ramiz Əliyev, SDGT idarə heyətinin üzvü: " Təbiət qoynunda istirahət edə bilmək üçün Nəsimi adına Mədəniyyət və İstirahət Parkı ərazisinin daha səmərəli olduğunu düşünürəm. Təbii ki, töküb, bulaşdırmadan sadəcə normal şəkildə açıq havada istirahət edə bilmək üçün park ərazisi daha səmərəlidir. Çünki piknik dedikdə yaşıllıq, meşəlik kimi ərazi nəzərdə tutulur və evdən apardığın hazır qidalarla təbiət qoynunda, təmiz havada mədəni istirahət edib, dincəlmək olar. 

Sara Rəcəbli, gənc sahibkar, Prezident mükafatçısı: "Sumqayıtda pikniklər üçün zonaların olması əla olardı, lakin təmizliyə də mütləq nəzarət olunmaq şərtilə. Hər gələn gedən zibil atsa, mənası olmayacaq həmin məkanlarda istirahətin. Sahilə yaxın ərazilərdə, parklarda, daha çox sakit guşələrdə belə zonalar ayrılsa, çox yaxşı olar.” 

Vüsal Məmmədov, "168 saat” qəzetinin baş redaktoru: " Zənnimcə, piknik zonları üçün Nəsimi adına Mədəniyyət və İstirahət Parkından istifadə etmək olar. Bulvar ərazisindəki yaşıllıq hələ buna uyğun deyil. Amma inanmıram ki, buna kütləvi maraq olsun. Hər bir ideya gerçəkləşdirildiyi cəmiyyətin streotiplərinə, davranış tərzinə və arzularına uyğun olmalıdır.”

Nərmin Şamilbəyli, qadın məsələləri üzrə ekspert, jurnalist:  "Bütün dünya ölkələrində gənclərin və ailələrin istirahəti üçün belə zonalar var, niyə bizdə olmasın? Lakin belə zonalar yaradılmamışdan qabaq əhali arasında ekoloji tərbiyələndirmə aparılmalıdır ki, açıq havada vaxt keçirən insan təbiətə ziyan vurmadan, dağıdıb, zibilləmədən səmərəli zaman keçirsin. Belə olan halda istər gənclərin, istərsə də ailələrin yığışaraq açıq havada səmərəli vaxt keçirmələri onların həm istirahətlərini maraqlı etmiş olar, həmçinin də qeyri ciddi ortamlarda ciddi müzakirələr aparıla bilər.”

Elmir Ağayev, otelçilik üzrə mütəxəss: "Sumqayıtın piknik-kamp perspektivləri yüksəkdir. Hesab edirəm ki, bunun üçün Sumqayıtda damba, batmış gəmidən sol tərəf istiqamətdə sahil boyunca xüsusi yerlər təşkil etmək olar. Şəhər rəhbərliyi tərəfindən içməli su, zibil qutuları, mühafizəçi sistemi, "besedka”lar, manqallar, masa və stulllar, çimərlik voleybolu üçün yer, uşaq əyləncə meydançası, balıq tutmaq üçün şərait təşkil etməklə sumqayıtlıların asudə vaxtlarını maraqlı keçirmələrini təşkil etmək mümkündür. Mən Sumqayıtın millət vəkillərinə də səslənirəm və şəhər sakinləri naminə belə təklifləri dəyərləndirərək səsləndirmələrini xahiş edirəm. 

Faiq Nuriyev, iqtisadçı: "Belə zonların yaradılması istənilən halda təqdirəlayiq haldır. Bu, yalnız məktəblilər və yaxud da gənclər üçün deyil, şəhər əhalisinin bütün yaş təbəqələrindən olan nümayəndələri üçün xoş istirahət, səmərəli zaman keçirmək üçün şərait deməkdir. Türkiyədə olarkən İzmir şəhərində diqqətimi çəkən belə bir məkan olmuşdu. İzmir-Manisa şossesinin üstündə "Çiçəkli köy” adlanan meşəlik bir sahə var ki, ərazi sahibkarlara verilib. Bu ərazidə çox sayda kiçik restoranlar açılıb və insanlar əsasən həftəsonları ya səhər yeməklərini ya da şam yeməklərini gətirib təbiət qoynunda yeyirlər. İstəyən restoranlardan ərzağını alıb qurulan şəraitdə ailəsiylə bişirib yeyə , istəyən də restoranlardan hazır alıb ağacların altında qidalana bilər. Düşünürəm ki, bulvar ərazisinin bir kənarında belə bir şəraitin qurulması əlverişlidir.”

Azərbaycanda turizm sektorunun inkişafı üçün atılan addımlar, dövlət dəstəyi, bu sahədə fəaliyyət göstərən iş adamlarını yeni ideyalar və yeniliklər tətbiq etməyə həvəsləndirib. Nəticədə ölkə vətəndaşlarına daha sərfəli və innovativ xidmətlər təklif edilir. Məlumat üçün bildirək ki, Bakı yaxınlığında -  Bakı-Şamaxı yolunun Qobustan rayonu ərazisində ölkədə ilk dəfə olaraq piknik zonası fəaliyyət göstərir. "Qobulənd” istirahət mərkəzinin ərazisində fəaliyyət göstərən xüsusi zona ailəvi və qrup formasında istirahəti sevənlər üçün nəzərdə tutulub. İstirahət mərkəzinin ərazisində vətəndaşların öz istirahətlərini mənalı və yaddaqalan keçirməsi üçün bütün şərait yaradılıb. Burada otel, restoran, uşaq əyləncə meydançaları, göl, balıq tutmaq üçün şərait var. Bakıda və dünya ölkələri şəhərlərində yaradılmış  belə zonalaradan nümunələr götürərək Sumqayıt ərazisində də belə bir şəraitin qurulması sakinlər üçün çox gözəl  fürsət olardı.

Xədicə Səxavət

Xeberle.com