Bundan sonra Ermənistandan olan çağırışçılar yalnız ölkə daxilindəki hərbi hissələrdə xidmət edəcəklər. Erməni əsgərlərin Qarabağa göndərilməsi tamamilə dayandırılıb. Orduya qış çağırışı zamanı ənənəvi püşkatmada yalnız Ermənistandakı hərbi hissələr arasında seçim edilib.
Xeberle.com xəbər verir ki, hərbi ekspert Şair Ramaldanov bununla bağlı Azvision.az-a açıqlamasında deyib ki, kapitulyasiya aktı imzalanandan sonra belə situasiyanın yaranacağı gözlənilən idi. O bildirib ki, məlum qış çağırışından sonra Qarabağda hansısa Ermənistan vətəndaşının gəlib xidmət aparması qeyri-real görünürdü:
"Bu, təbii haldır və erməni çağırışçıların bundan sonra Azərbaycan ərazisindəki hərbi hissəyə göndərilməyəcəyi təəccüb doğurmamalıdır. Çünki Azərbaycan ərazisində ancaq bu ölkəyə tabe olan hərbi qurumlar və ya silahlanmış rəsmi ordu nümayəndələri qala bilər. Ümumiyyətlə, hazırda nə illərlə haqqında danışılan status məsələsi var, nə də digər ermənilərin maraqlarına cavab verən hansısa şərtlərin yerinə yetirilməsi. Fakt budur ki, qələbə qazanan tərəf olan Azərbaycanın ərazi bütövlüyü əvvəlki kimi bərpa edildi, bütün dövlət sərhədlərində, o cümlədən Ermənistanla sərhəd xəttində yalnız bizim əsgərlər xidmət aparırlar. Təbii ki, belə bir reallığı yaradan Azərbaycan öz daxilində olan bütün hərbi prosesləri də bizim qanunlar çərçivəsində tənzimləməli idi. Belə olan təqdirdə Ermənistan vətəndaşı torpaqlarımıza gəlib xidmət apara bilməz”.
Hazırda bərpa proseslərinin getdiyini deyən Şair Ramaldanov postmüharibə dövründə ölkənin gücünü daha çox quruculuq işlərinə cəlb etdiyini söyləyib. Amma paralel olaraq hərbi məsələlər də ən üst səviyyədə diqqətdə saxlanılır, sərhədlərdə gücləndirmə işləri aparılır və ordumuz daha da inkişaf etdirilir:
"Doğrudur, hazırda bizim torpaqlarda ikinci bir ölkənin hərbçiləri də yerləşdiriliblər. Amma bu üçtərəfli razılaşma əsasında müvəqqəti xarakter daşıyan məsələdir. Sülhməramlı qüvvələrin yeganə məqsədi regionda sülhün bərqərar olub qorunmasıdır. Çünki uzun illər Ermənistanın yürütdüyü işğalçılıq siyasəti nəticəsində hazırda Azərbaycan ərazisi olan Qarabağda yaşayan ermənilərdə azərbaycanlılara qarşı radikal yanaşmalar, düşmənçilik meylləri qalıb. Müəyyən bir zamana ehtiyac var ki, sülhməramlılar Qarabağa aid bəzi ərazilərdə vəziyyətə nəzarət etsinlər, qarşıdakı illərdə heç bir insident yaşanmasın. Gələcəkdə konstitusiyamızın tələblərini yerinə yetirmək istəyən Qarabağ erməniləri istəsələr bizimlə birlikdə yaşaya bilərlər. Kimsə radikal meyllərə yön alsa, həmin qruplar gec-tez torpaqlarımızı tərk etməyə məcbur ediləcəklər. Amma bizim içimizdə yaşayaraq müəyyən iddialara düşmək, hansısa ordu quruculuğu ilə məşğul olmaqdan, hərbi hissələr saxlamaqdan söhbət belə gedə bilməz. Hazırda bəzi ərazilərdə müvəqqəti olaraq saxlanılan müəyyən silahlı hərbçilər qalıblar. Həmin silahlılar o bölgələrdə yerləşiblər ki, oraya sülhməramlılar nəzarət edirlər. Erməni hərbçilərin bu cür yerləşməsi müvəqqəti xarakter daşıyır. Xahiş edirlər ki, onlar üçün heç bir gərginlik yaşatmayaq. Yəni bu formada zəif, xaotik hərbi qruplar qalıb, ağır texnikaların hamısı regiondan uzaqlaşdırılaraq Ermənistana daşınıb. Bununla bağlı kifayət qədər sübutlar, əlimizdə materiallar var. Həmin faktlar separatçı rejimə aid olmuş texnikaların Ermənistana köçürüldüyünü sübut edir. Ali Baş Komandan, cənab İlham Əliyev əvvəldən xalqa necə bəyan etmişdisə, bütün proseslər həmin ssenari üzrə davam edir”.
Hərbi ekspert onu da vurğulayıb ki, regiondakı proseslərdən söz açarkən Birgə Monitorinq Mərkəzi də unudulmamalıdır:
"Azərbaycan liderinin müdrikliyinin göstəricisidir ki, Türkiyə kimi ölkənin Monitorinq Qrupunda təmsilçiliyi təmin edildi. Ümumiyyətlə bu bir faktdır ki, bu günə qədər bizim maraqlarımızın təmin olunması istiqamətində xeyli nəticələr əldə etmişik. Bunlardan birini qeyd etdim - ağır texnikaların Ermənistana köçürülməsi. Digər məqam bundan sonra torpaqlarımıza kimin necə gəldi daxil olmasının qarşısının alınmasıdır. Yəni sülhməramlılar artıq maraqlarımızı da nəzərə alırlar. Xatırlayırsınızsa, bu günlərdə bir qrup xarici jurnalist Xankəndinə İrəvandan gəlib keçmək istəyirdi ki, onları yarı yoldan geri qaytardılar. Həmin əcnəbilərə izah ediblər ki, siz Azərbaycan torpaqlarına ayaq basırsınız, icazəni Bakıdan alın! Yəni bizim maraqlarımıza cavab verən bütün proseslər öz axarı ilə gedir.
Bir maraqlı məqamı da deyim ki, Ermənistanda cərəyan edən proseslər hərbi məsələlərə təsirsiz ötüşmür. Son zamanlar Koçaryan kimi şəxs belə artıq status haqqında heç nə demir. Halbuki, o, Paşinyana müxalif mövqedə dayanan şəxsdir. Yəni artıq Ermənistanda müxalifətli iqtidarlı hər kəs anlamağa başlayıb ki, Azərbaycanla düşmənçilikdən heç nə qazanmayacaqlar, revanşist ideyalarla nələrisə əldə etmək mümkün deyil. Azərbaycan Ordusu güclü ordu olduğunu artıqlaması ilə sübut etdi. Bundan sonra da öz torpaqlarını müdafiə etməyə qadir olduğunu sübut edə bilər”.
Ramaldanov Azərbaycanın yanında Türkiyə kimi qardaş, iqtisadi-siyasi qüdrəti bütün dünyaya bəlli olan, NATO-da aparıcı dövlətlərdən sayılan bir ölkənin dayandığını xatırladaraq bundan sonra heç kimin bizim torpaqlara göz dikməyəcəyini bildirib:
"Ankara Azərbaycanla bağlı baş verən bütün həssas proseslərin gedişinə mənəvi cəhətdən hər zaman dəstək göstərib. Əgər ehtiyac olarsa, meydana da atılıb hərtərəfli dəstəyini əsirgəməyəcək. Bilirsiniz ki, bununla bağlı hüquqi baza var və bunu İrəvandakı hərbi-siyasi rejim gözəl anlayır. Hər an Türkiyənin istənilən növ hərbi birləşməsi, istənilən sayda ölkəmizə gəlib maraqlarımızı qorumağa, dəstək olmağa hazırdır. Hərbi dəstək üçün ideal hüquqi baza işlənib hazırlanıb. Bu baza da ona görə yaradıldı ki, bəzi qüvvələr yenidən Cənubi Qafqazda stabilliyi pozmaq, Ermənistanı bir daha təxribatçı addımlara sövq etməsin. Azərbaycan artıq 90-cı illərdəki kimi meydanda gücsüz və tək dayanmayıb, arxamızda Türkiyə ilə yanaşı nüvə silahına sahib Pakistan kimi böyük dost dövlət durur. Yəni beynəlxalq aləmdə, regionda olan nüfuzumuz günü-gündən xeyli dərəcədə artır, hərbi dəstəklər çoxalır. Ona görə ki, bizim işimiz haqq işi olub, kiminsə torpağına girib orada qoşun saxlamamışıq. Necə ki, bunu uzun illər Ermənistan etdi. İndi də ağıllanmağa başlayır, öz çağırışçılarını sərhədi daxilində saxlayırlar. Hərbi potensialımız artıq İrəvana bəlli oldu və onlar bundan sonra bizim digər qonşularla qurduğumuz normal münasibətlərə baxıb mehriban qonşu siyasətinə qayıtmalıdırlar. Gedən proseslər də onu göstərir ki, Ermənistanda artıq çoxları bunu anlamağa başlayır. İşğalçılıq erməniləri uçuruma apardı. Yenə də İrəvanda müəyyən qüvvələr var ki, Qarabağ amilini əlində bayraq edib Paşinyanı devirməyə çalışır. Amma nə Paşinyan hakimiyyəti, nə də həmin qüvvələr ölkəmizə qarşı əvvəlki tək sərt görünmürlər. Düşünürəm ki, gələcəkdə hər iki ölkə arasında sülh müqaviləsi də bağlana bilər. Bu müqavilədən sonra yaxın qonşular kimi müəyyən proseslər başlayacaq və İrəvan da bundan qazanan tərəf sayılacaq. Naxçıvana gedən yol açılacaq, kommunikasiyalar bərpa olacaq, regionda iqtisadi bum yaşanacaq.
Artıq dövlətlər arasında olan münasibətlər hərbi amillərlə deyil, iqtisadi təsirlər üzərindən önə çıxır. Ona görə də Ermənistan bizim iqtisadi potensialımızdan yararlanmağa çalışmalıdır. Ermənistandakı siyasi böhran normal hala gəldikcə, əlaqələrdə də normal münasibətlər öz əksini tapacaq. Yaxın gələcəkdə Azərbaycanla sərhəd məsələləri də tam həll olunacaq, bir qarış belə torpaq ermənilərin əlində qalmayacaq. Qazaxın məlum yaşayış məntəqələri belə gündəmdən düşməyib. Cənab Prezident necə demişdisə, bütün siyasi, hərbi, iqtisadi proseslərin hamısı öz yerini aldı. Gələcək planlarla bağlı deyilənlər də əminəm ki, öz yerini tapacaq. Bundan sonra da cənab Prezidentin müdrikliyi sayəsində tək ordu quruculuğunda və siyasi məsələlərdə deyil, ümumilikdə regionda yaratdığımız yeni situasiyada da müsbət dəyişikləri görəcəyik”.
Xəbərdən istifadə edərkən istinad etmək vacibdir.
