"Sumqayıt Texnologiyalar Parkı” (STP) Şirkətlər Qrupu böyük Qələbəmizdən sonra ilk dəfə qeyd etdiyimiz 8 noyabr - Zəfər Günü münasibətilə "Zəfər ağacı” abidəsi hazırlayıb. Abidə 44 günlük Vətən müharibəsində canından keçmiş qəhrəman şəhidlərimizin əziz xatirəsini əbədiləşdirmək məqsədi daşıyır.
STP-dən Xeberle.com-a bildirilib ki, "Zəfər ağacı” paslanmaya davamlı metaldan hazırlanmış gövdə və budaqlardan, həmçinin budaqlardan asılmış, üzərində şəhidlərimizin adları yazılmış 3000 metal hərbi adlıqlardan ibarətdir. Ağacın hündürlüyü 2,9 metr, eni 2,2 metr və çəkisi 400 kiloqramdır. Azərbaycan vətəndaşları və şəhərimizin qonaqları "Zəfər ağacı”nı görmək üçün noyabrın 7-dək kimi Bakı Bulvarı ərazisində keçirilən "Qarabağ qəhrəmanlarının izi ilə” adlı yarmarkanı ziyarət edə bilərlər. "Zəfər ağacı”nın noyabrın 8-də Sumqayıt Şəhərinin Şəhidlər Xiyabanında quraşdırılması planlanır.
Qeyd edək ki, yarmarkadan əldə olunacaq vəsait Azərbaycan Respublikasının ərazi bütövlüyünün müdafiəsi ilə əlaqədar yaralananlara və şəhid ailələrinə dəstək məqsədilə "YAŞAT” Fonduna ianə ediləcək.
Xəbərdən istifadə edərkən istinad etmək vacibdir.
