Sumqayıt avtovağzalında nəqliyyat vasitələrinin avtovaqzaldan istifadəsi üçün 0,50 AZN məbləğində ödəniş tələb edilir.
Xeberle.com xəbər verir ki, bu barədə sosial şəbəkələrdə məlumat yayılıb. Bildirilir ki, avtovağzala giriş zamanı nəqliyyat vasitələrindən 50 qəpik məbləğində vəsait alınır. Bu da avtomobili olan şəhər sakinlərinin narazılığına səbəb olub.
Maraqlıdır, Sumqayıt avtovağzalında yığılan 50 qəpiklər kimin cibinə gedir?
Sumqayıt Avtovağzalının müdiri Şamil Abbasov Xeberle.com-a açıqlamasında məsələyə belə aydınlıq gətirib: "Avtovağzalın da tərkibində olduğu "İNTER-TRANS- MMC" mənə məxsusdur. Avtovağzala daxil olan nəqliyyat vasitələri ödəniş etməlidirlər. Ödənişlər dayanacaq haqqı olaraq yığılır".
Şamil Abbasov həmçinin bildirib ki, 2 il sərt karantin dönəmində bağlı qalan avtovağzal üçün kifayət qədər vergi ödənişi yığılıb: "Bununla yanaşı avtovağzal ərazisinin təmirə ehtiyacı var. Bütün bu problemləri həll etmək üçün bu addım atılıb".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
