2 saylı Ərazi Vergilər Departamentinin və 3 saylı Ərazi Vergilər İdarəsinin Vergi borclarının alınması şöbəsinin əməkdaşları tərəfindən bir neçə borclu vergi ödəyicisində əmlakın siyahıya alınması tədbirləri keçirilib. Xeberle.com Vergilər Nazirliyinə istinadən xəbər verir ki, 2 saylı ƏVD-nin Vergi borclarının alınması şöbəsinin əməkdaşları tərəfindən Abşeron rayonu, Xırdalan şəhəri, ev 69 ünvanda yerləşən, "Azərpark” MMC-yə məxsus sabun və yuyucu tozların istehsalı zavodunun fəaliyyəti vergi orqanları tərəfindən araşdırılarkən, onun 28887 manat məbləğində vergi borcunun yarandığı müəyyən edilmiş, bu barədə vergi ödəyicisinə bildiriş göndərilsə də, borc məbləği qanunvericilikdə nəzərdə tutulan müddətdə ödənilməyib. Vergi Məcəlləsinin 89-cu maddəsinə əsasən, yaranmış vergi borcunun ödənilməsini təmin etmək məqsədilə istehsal obyektində əmlakın siyahıya alınması haqqında Qərar çıxarılmış və obyektdəki 26600 manat dəyərində sabun istehsal edən qurğu müəyyən edilmiş qaydada siyahıya alınıb.
Həmin gün Sumqayıt şəhərindəki Üzvi-Sintez zavodunun ərazisində yerləşən, "Leyla-R” MMC-yə məxsus polietilen örtük istehsalı ilə məşğul olan sexdə də əmlakın siyahıya alınması tədbiri keçirilib. Vergi ödəyicisinin 3507 manatlıq vergi borcunun təmin edilməsi məqsədilə istehsal obyektindəki 3400 manat dəyərində polietilen paketlər müvafiq qaydada siyahıya alınıb.
Əmlakın siyahıya alınması ilə bağlı daha bir tədbir Sumqayıt şəhəri, 6 mkr., ev 1 ünvanda yerləşən, fiziki şəxs Ələkbərov Rəşid Ramiz oğluna məxsus kafedə keçirilib. Vergi ödəyicisinin 2260 manat məbləğində vergi borcunun ödənilməsini təmin etmək üçün kafedəki 1880 manat dəyərində məişət texnikası müvafiq qaydada siyahıya alınıb, borcun qalan hissəsi yerindəcə ödənilib.
3 saylı ƏVİ-nin Vergi borclarının alınması şöbəsinin əməkdaşları tərəfindən Şabran şəhəri, M.Ə.Rəsulzadə küçəsi, ev 4, mənzil 7 ünvanda yerləşən, fiziki şəxs Kərimova Firuzə Tacəddin qızına məxsus alkoqollu içkilər və tütün məmulatlarının satıldığı mağazada əmlakın siyahıya alınması tədbiri keçirilib.Vergi ödəyicisinin 1680 manat məbləğində vergi borcunun ödənilməsini təmin etmək məqsədilə mağazadakı əmlakın siyahıya alınması haqqında Qərar çıxarılmış və 1292 manat dəyərində spirtli içkilər və tütün məmulatları müəyyən edilmiş qaydada siyahıya alınıb, borcun qalan hissəsi yerindəcə ödənilib.
Vergi əməkdaşları Qusar şəhəri, Qusar-Quba yolunun 1-ci km-də yerləşən, fiziki şəxs Tağıyev Elçin Ənvər oğluna məxsus "Ay işığı” restoranında da əmlakın siyahıya alınması tədbiri keçiriblər. Vergi ödəyicisinin 1348 manat dəyərində vergi borcunun ödənilməsinin təmin edilməsi məqsədilə restorandakı 1400 manatlıq məişət avadanlığı müvafiq qaydada siyahıya alınıb.