Bu cihadşüvənlərə aldanmayın!

İndicə bir media xəbərindən sələfi adı ilə təqdim edilən qəribə adlar səsləndirərək, onların sələfi alimi olduğunu da qeyd edərək, guya cihad fətvası verdiklərini bir saytdan oxudum. Ümumiyyətlə cihadın adından sui-istifadə edən bu şəxslərin sələf alimləri ilə yaxından və uzaqdan heç bir əlaqəsi oxdur. Bütün böyük sələf alimləri, allamələri, şeyxləri əvvədən bildirirdilər ki, Suriyada cihad yoxdur. Sonra bəzi radikal meyilli "şeyxçiklərin" fətvası ilə bir çox dində həddini aşanları qızışdırıb orada "cihad" var deyə ora çağırdılar. Aldananlar getdi. Gedənlər isə bir çox müsəlmanların ölməsinə, orada insanların ac-susuz qalmasına səbəb oldular. İndi də vəziyyəti elə həddə gətiriblər ki, hətta Suriyada məzlum olan insanlara belə kömək üçün gedənlər olur. Buna baxmayaraq böyük alimlər heyətindən heç biri orada Cihaddır demirlər. Orada cihad olduğunu deyənlərin bir çoxu radikallardır. Bir çoxu isə orada Cihadın yalnız Suriya xaqlına məxsus olduğunu deyirlər. Yəni orada cihad var deyənlərin bir çoxu bunu Suriya xalqı üçün xüsusiləşdirirlər. Bir daha müsəlmanlara xatırladıram ki, bu cür şeyxçiklərə aldanıb həyatlarını təhlükəyə atmasınlar. Bu məsələ beynəlxalq səviyyədə dövlətlərarası münasibətlərdə tənzimlənən məsələdir. Bu məsələyə dövlətdən icazəsiz qarışmaq islama ziddir. Bu məsələdə media ehtiyatlı olsun. Bu barədə kütləvi informasiya vasitələrində ciddi maarifləndirici işlər aparılmalıdır. Xatırladım ki, müasir dövrümüzdə bütün dünyada, beynəlxalq aləmdə, bunun da təsiri nəticəsində vətənimizdə bəzi cihadşüvənlər, “cihadistlər” ortaya çıxmışlar. Bu cihadşüvənlər cihadın islam hüququnda yer alan hökmlərini, qaydalarını, prinsiplərini, qadağanlarını bilmirlər. Tək məqsədləri cihad adı ilə özlərinə müəyyən zəmin hazırlamaqdır. Bir çoxu “Müasir dövrümüzdə cihad etmək bütün ümmətə fərzdir” deyərək islama gələn yeni gəncləri də yalnış istiqamətə sürükləyirlər. Bunu deyən bir insan bu sözün hansı məna daşıdığını, hansı məqsədlə deyildiyini, doğuracağı nəticənin nə olduğunu bilmir. Buna baxmayaraq sanki müsəlmanlar düşmənlə döyüşməyin, cihadın, vətən müharibəsinin nə olduğunu bilmirlər, bilmədikləri cihadı bu “cihadistlər” öyrədəcəklər. Belə etməklə müasir “cihadistlər” özlərini cihad müəllimi kimi təqdim edirlər. Müsəlmanların isə bu cür cihadşüvənlərdən, “cihadistlərdən” cihad adı ilə qəsd etdikləri, icra etmək istədikləri qorxunc hərəkətlər və fitnə fəsadlardan öyrənəcəkləri heç bir şey yoxdur. Cihad kimi böyük və şərəfli bir adı istismar edərək, mənimsəyərək yerinə yetirmək istədikləri məqsəd Allah Rəsulunun (ona və ailəsinə salam olsun) öyrətdiyi şəriət mənasında olan cihadın məqsədindən tamamilə uzaqdır. Onların məqsədi bombalamaq, yıxmaq, dağıtmaq, hamıya kafir deməklə insanları təkfir etməkdir. Müsəlmanları hər kəs niyətinə görə həşr olunacaq deyərək öldürməkdə günah görməyənlər sakit, rahat, əmin-aman, toxunulmaz yaşayan qeyri müsəlmanları, müsəlmanlar içərisində yaşayan müsəlman olmayanları qətl edirlər. Bunu həyata keçirmək istəyənlərin məqsədləri yer üzərində fitnə-fəsad, təxribat törətmək, güvənlik, əminlik, sakitlik, toxunulmazlıq içərisində olan müsəlmanları terror edərək qəlblərinə qorxu salmaq, müharibə etmək, vətəndaşları qarşı-qarşıya qoymaq, cihadın mübarək adını, xeyirli adını şərə tərəf istiqamətləndirməkdir. Axını yayılmaq təhlükəsi olan bu batil, islamda yeri olmayan mənfi fikir və əməllərə qarşı müsəlmanların islamı düzgün mənimsəyən, əqidəsi, minhəci, metodu doğru olan alimlərin ətrafında toplanmaları çox vacibdir. Bu barədə alimlərə düşən vəzifə isə bu kimi şübhəli məsələləri çürütmək, yalan olduğunu isbat etməkdir. Allah təla hər birimizi xeyir işlərə müvəffəq etsin! Amin!

Əkrəm Həsənov, ilahiyyat üzrə fəlsəfə doktoru