Külək kəsilir. İyulun 15-də Abşeron yarımadasında gündüz saatlarında cənub-şərq küləyinin üstünlüyü və havada rütubətliliyin bir qədər çox olması meteohəssas insanlarda diskomfort hissi yaratsa da, sonrakı iki gün ərzində davamlı xəzri küləyinin əsməsi müsbət amildir.
Bu gün axşamdan etibarən külək mülayimləşəcək. Ekologiya və Təbii Sərvətlər Nazirliyinin Milli Hidrometeorologiya Departamentindən verilən məlumata görə, iyulun 15-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Gündüz mülayim cənub-şərq küləyi əsəcək.
İyulun 15-də Bakıda və Abşeron yarımadasında havanın temperaturu gecə 20-24˚, gündüz 28-33˚ isti olacaq.
Abşeron çimərliklərində dəniz suyunun temperaturu: Sumqayıt, Novxanı, Pirşağı, Nardaran, Bilgəhdə 22-23, Zaqulba, Buzovna, Mərdəkan, Şüvəlanda 23-24, Türkan, Hövsan, Şıx, Sahildə 24-25 dərəcə isti təşkil edəcək.
Azərbaycanın rayonlarında iyulun 15-də hava şəraitinin əsasən yağmursuz keçəcəyi, lakin gecə və axşam bəzi dağlıq ərazilərdə şimşək çaxacağı, qısamüddətli yağış yağacağı gözlənilir. Şərq küləyi əsəcək, arabir güclənəcək.
Havanın temperaturu gecə 20-25, gündüz 33-38, dağlarda gecə 13-18, gündüz 24-29 dərəcə isti olacaq. (anspress.com)
Xəbərdən istifadə edərkən istinad etmək vacibdir.
