Bu gün Bakı Ağır Cinayətlər Məhkəməsində qətl törətməkdə təqsirləndirilən Kərim Kərimov və Fuad Əliyevin cinayət işi məhkəmə prosesi yekunlaşıb.

Hakim Rahib Salmanovun sədrliyi ilə keçirilən prosesdə hökm oxunub. Hakimlər kollegiyasının hökmünə əsasən Kərim Kərimov 18 il, Fuad Əliyev 17 il müddətə azadlıqdan məhrum edilib.

Qeyd edək ki, qətl keçən il iyulun 22-də saat 05:30 radələrində paytaxtın Səbail rayonu ərazisində, "Xəqani” bağının yaxınlığında baş verib.

İstintaqla müəyyən edilib ki, Şirvan şəhər sakini Kərim Kərimov həmyerliləri Fuad Əliyev, İlham Şadıyev və Əli Süleymanov ilə birlikdə "Xəqani” bağında olarkən ictimai qaydanı kobud şəkildə pozaraq Şahin Quliyevlə mübahisə ediblər. Bu zaman K. Kərimov üstündə gəzdirdiyi bıçaqla, Fuad Əliyev isə fiziki zor tətbiq etməklə Ş.Quliyevə müxtəlif dərəcəli bədən xəsarətləri yetirərək hadisə  yerindən qaçıblar. Həkimlərin səyinə baxmayaraq, Ş.Quliyevin həyatını xilas etmək mümkün olmayıb.

Hüquq mühafizə orqanları tərəfindən həyata keçirilən birgə istintaq və əməliyyat-axtarış tədbirləri nəticəsində cinayətin törədilməsində şübhəli bilinən Kərim Kərimov və Fuad Əliyev tutularaq istintaqa cəlb olunublar. K. Kərimovun üzərinə baxış keçirilərkən bir ədəd bıçaq və "beşbarmaq” aşkar edilərək maddi sübut kimi götürülüb.(lent.az)