Bu gün Sumqayıt Şəhər Məhkəməsində 3 yaşlı uşağın ölümündə təqsirləndirilən "Real" Tibb Mərkəzinin həkim-anestezioloqu İsmayıl Qəmbərovun cinayət işi üzrə məhkəmə prosesi davam etdirilib.
Prosesə sədrlik edən Ruhiyyə Əsgərova hakimə verilən etirazın təmin olunmadığını bildirib.
Hakim onu da deyib ki, əlavə şahid qismində məhkəmədə ifadə verməsi üçün Səhiyyə Nazirliyinin baş anestizioloq-reanimatoloqu Aydın Qədirov dəvət edilib və bununla bağlı Səhiyyə Nazirliyinə rəsmi məktub göndərilib.
 
Vəkil Əli Hüseynov vəsatətlə çıxış edərək, bildirib ki, hüquqlarını müdafiə etdiyi şəxsə qarşı irəli sürülən ittihamlardan biri də rəsmi sənədlərin saxtalaşdırılmasıdır. O, burada ittiham predmeti olmadığını deyib: "Çünki jurnal rəsmi sənəd deyil. Burda isə jurnalın saxtalaşdırılmasından söhbət gedir. Mən bunun araşdırılması üçün aidiyyatı orqanlara sorğu verilməsini istəyirəm".
Hakim vəsatəti hazırkı mərhələdə baxılmamış saxlayıb.
Sonra prosesdə əlavə şahidlər dindirilib.
Proses noyabrın 15-də davam etdiriləcək. 
 
Klinikanın direktoru Vidadi Əzimov qeyd edib ki, hadisə baş verən gün axşam saatlarında A. Qurbanlının vəziyyətinin pisləşməsi ilə bağlı məlumat alıb: "Mən də dərhal palataya gəldim. Gördüm ki, həkimlər uşağa süni nəfəs verir. Ancaq təəssüflər olsun ki, səylərimiz uğursuz oldu və uşaq dünyasını dəyişdi. Hadisə günü bizə də zərərçəkənlərin yaxınları tərəfindən fiziki təzyiq oldu. Təbii ki, bu da anlaşılandı. Uşağın əməliyyatdan sonra görüntüləri var. Ordan görünür ki, uşaq əməliyyatdan sonra oyanıb və biz bu görüntüləri məhkəməyə təqdim etməyə hazırıq".
 
V. Əzimov deyib ki, xəstəyə cavabdeh şəxs birbaşa müalicə həkimi cərrah İlham Ağayevdir.
Sonra klinikanın qəbul şöbəsində işləyən Vəfa Rəhimova ifadə verib: "Əməliyyatdan sonra mən uşağın palatasına girdim, soruşdum ki, necəsən, dedi ki, yaxşıyam. Amma sonradan eşitdik ki, uşağın vəziyyəti pisləşib".
Prosesdə digər şahidlər də dindirilib.
 
İttihama görə, Sumqayıt şəhər sakini, 2014-cü il təvəllüdlü Qurbanlı Arzu Sənan qızı 2016-cı il iyunun 16-da günorta saatlarında Sumqayıt şəhərindəki "Real" Tibb Mərkəzində boğazında damaq badamcıqlarının (qlanda) iltihabından əməliyyat olunub. Həmin gün gecə saatlarında uşağın vəziyyəti pisləşib və o, dünyasını dəyişib. Meyit ekspertizaya göndəriləndən sonra uşağın boğulma nəticəsində dünyasını dəyişdiyi müəyyən edilib. Faktla bağlı Sumqayıt şəhər Prokurorluğunda Cinayət Məcəlləsinin 124-cü (ehtiyatsızlıqdan adam öldürmə) və 320.1-ci (Rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama, satma və ya saxta sənədlərdən istifadə etmə - hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədi ilə saxtalaşdırma və ya qanunsuz hazırlama, yaxud bu cür sənədi satma, habelə eyni məqsədlə Azərbaycan Respublikasının saxta dövlət təltifini, ştampı, möhürü, blankı hazırlama və ya satma) maddələri ilə cinayət işi başlanılıb və "Real" Tibb Mərkəzinin həkim-anestezioloqu İ.Qəmbərov təqsirləndirilən şəxs qismində cəlb edilib.
İ.Qəmbərov barəsində həbs qətimkan tədbiri seçilməyib.(APA)

Xəbərdən istifadə edərkən istinad etmək vacibdir.