Bu gün Bakı Ağır Cinayətlər Məhkəməsində Sumqayıtda idmançının ölümünə səbəb olan Əhəd İsmayılov və onun oğlu Ramil İsmayılovun cinayət işi üzrə məhkəmə iclası davam etdirilib.
Xeberle.com-un report-a istinadən xəbərinə görə, hakim Zeynal Ağayevin sədrliyi ilə keçirilən prosesdə şahid qismində Fərid Mehmanov ifadə verib.
O, Sumqayıtda obyekt işlətdiyini, hadisə günü orada olduğunu bildirib: "Ramingil axırıncı otaqda oyun oynayırdılar. Bu vaxt mərhum Rasif içəri daxil oldu. Birdən içəridə dava düşdü, tərəfləri ayırdıq. Sonradan məlum oldu ki, söhbət "adapter" üstündə olub. Axşam obyekti bağlayanda Raminin atası Əhədi orada gördüm. O, obyektə baxıb getdi. Səhəri gün eşitdim ki, axşam bu hadisə baş verib".
Hakimin suallarına cavab verən şahid qeyd edib ki, obyektdəki videogörüntüləri polisə təqdim edib.
Daha sonra təqsirləndirilən şəxsin vəkili vəsatət qaldırıb. O, cinayət işinin ibtidai istintaqını aparan müstəntiqlərin və prokuror köməkçisinin məhkəmədə dindirilməsini istəyib.
Vəsatət baxılmamış saxlanılıb.
Prosesdə hakim elan edib ki, cinayət işi üzrə iki şahid məhkəməyə gəlməyib. Məhkəmə həmin şəxslərin barəsində məcburi gətirilmə qərarı çıxarıb.
Məhkəmənin növbəti iclası 2019-cu ilin yanvarın 8-nə təyin edilib.
Qeyd edək ki, hadisə ötən il Sumqayıt şəhərin 21-ci məhəlləsində baş verib. Dava zamanı Sumqayıt şəhər sakini olan iki nəfər - 1992-ci il təvəllüdlü Həbibov Rasif Asif oğlu və 1988-ci il təvəllüdlü Dadaşov Samir Tahir oğlu bıçaqlanıblar. Yaralılar dərhal xəstəxanaya çatdırılıb. Lakin dörd gündən sonra R.Həbibov xəstəxanada dünyasını dəyişib.
Hüquq-mühafizə orqanların əməkdaşları tərəfindən hadisəni törətməkdə şübhəli bilinən ata-oğul Ramil və Əhəd İsmayılovlar saxlanılıb.
Məlumatda qeyd edilib ki, hadisədə iştirak edən şəxslər qonşu olublar. Hadisə söyüş üstündə olub.
Faktla bağlı Sumqayıt Prokurorluğundan Cinayət Məcəlləsinin 126.3-cü (qəsdən sağlamlığa ağır zərər vurma, zərərçəkənin ölümünə səbəb olduqda) maddəsi ilə ittiham verilib.
Onu da qeyd edək ki, R.Həbibov idmançı olub.
Xəbərdən istifadə edərkən istinad etmək vacibdir.
