Bakı Ağır Cinayətlər Məhkəməsində qeyri-rəsmi ər-arvad münasibətində olduğu qadını öldürməkdə ittiham olunan Seymur Abdullayevin cinayət işi üzrə məhkəmə prosesi başlayıb.
Hakim Rasim Sadıxovun sədrliyi ilə keçirilən məhkəmənin hazırlıq iclasında təqsirləndirilən şəxsin anket məlumatları dəqiqləşdirilib.
Qeyd edək ki, hadisə bu il mayın 3-də Sumqayıtda Nərimanov küçəsi, "Mərkəzi bazar" ərazisində qeydə alınıb.
Eynək satılan dükanların birində Abdullayev Seymur Zərablı oğlu şəxsi münasibətlər zəminində qeyri-rəsmi yaşadığı Əmənova Gülnar Şaməddin qızına bıçaqla çoxsaylı zərbələr endirib.
Xəstəxanaya çatdırılan qadın 11 gün komada qaldıqdan sonra dünyasını dəyişib.
Seymur Abdullayevə qarşı Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə ittiham elan edilib.(apa.az)
Xəbərdən istifadə edərkən istinad etmək vacibdir.
